فوتو: الينا تۋلەباەۆا/ Kazinform
قىزىلوردا وبلىسىنىڭ جاڭاقورعان اۋدانىندا مەكتەپتٸڭ باس ەسەپشٸسٸ بولعان ابزال سەيدەكوۆكە قاتىستى قىلمىستىق ٸس بويىنشا سوت ٷكٸمٸ شىقتى. ول قىزمەت بابىن پايدالانىپ, مەملەكەتتٸك مەكەمە قارجىسىن قالتاعا باسقان. بۇل تۋرالى قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتٸنەن حابارلادى.
- تەرگەۋ بارىسىندا انىقتالعانداي, ابزال سەيدەكوۆ 2023 جىلدىڭ 1 قاڭتارى مەن 2024 جىلدىڭ 31 جەلتوقسانى ارالىعىندا ٶزٸنە سەنٸپ تاپسىرىلعان لاۋازىمدىق مٸندەتتٸ تەرٸس ماقساتقا پايدالانىپ, مەكتەپ قىزمەتكەرلەرٸنٸڭ ايلىق جالاقىسىن ەسەپتەۋ كەزٸندە ٷنەمدەلگەن قاراجاتتى ٶز شوتىنا زاڭسىز اۋدارىپ وتىرعان. جالپى سوماسى 36 ميلليون تەڭگە كٶلەمٸندەگٸ قاراجاتتى جىمقىرىپ, ونى «Pin Up» بۋكمەكەرلٸك قوسىمشاسى ارقىلى قۇمار ويىنعا جۇمساعان. الايدا, تەرگەۋ بارىسىندا كەلتٸرٸلگەن زالال تولىعىمەن ٶتەلدٸ, 36 ميلليون تەڭگە بيۋدجەتكە قايتارىلدى, - دەلٸنگەن حابارلامادا.
مەكتەپتٸڭ بۇرىنعى باس ەسەپشٸسٸ قىلمىستىق كودەكستٸڭ 189-بابىنٸڭ 4-بٶلٸگٸ 2-تارماعى (سەنٸپ تاپسىرىلعان بٶتەن مٷلٸكتٸ يەمدەنٸپ الۋ نەمەسە ىسىراپ ەتۋ, اسا ٸرٸ مٶلشەردە) بويىنشا كٸنەلٸ دەپ تانىلىپ, سوت ٷكٸمٸمەن 7 جىلعا باس بوستاندىعىنان ايىرىلدى.
– سونىمەن قاتار 7 جىل مەرزٸمگە ەسەپشٸلٸك قىزمەتپەن اينالىسۋ قۇقىعىنان ايىرىلدى. سوتتالۋشى جازاسىن قىلمىستىق اتقارۋ جٷيەسٸنٸڭ قاۋٸپسٸزدٸگٸ ورتاشا مەكەمەسٸندە ٶتەيدٸ, - دەلٸنگەن دەپارتامەنت حابارلاماسىندا.
بۇعان دەيٸن بٸز قارجىلىق مونيتورينگ اگەنتتٸگٸ جىل باسىنان بەرٸ 36 قارجى پيراميداسىنىڭ قىزمەتٸن توقتاتقانىن جازعانبىز.
