Qyzylorda oblysynda mal baǵýǵa shyqqan 12 jastaǵy bala bir kúnnen beri tabylmai jatyr, dep habarlaidy QazAqparat.
Oqiǵa Qazaly aýdanyna qarasty Káýkei aýyldyq okrýgindegi Ajar eldi mekeninde 16 qarashada boldy.
Sol aýylda turatyn 2009 jylǵy bala Dáýletbai Janarys Ǵalymjanuly saǵat 09.00 shamasynda eldi mekenniń kezekpen baǵylatyn qoiyn jaiýǵa shyqqan.
Aldyndaǵy 200 qoimen shyǵys betkeidegi 10-15 shaqyrymda ornalasqan «Úshaǵash» degen mal jaiylymdyq jerge qarai baǵyt alǵan.
Sodan beri úiine qaita oralmaǵan.
Oqiǵa ornyna politsiia qyzmetkerleri shuǵyl jetip, izdestirý jumystaryna kiristi.
Sondai-aq, oǵan aýyl turǵyndary, jasóspirimniń týǵan-týystary, jedel qutqarý qyzmeti, shekara qyzmetkerleri tartylǵan.
Bul maqsatta avtokólikter men arnaiy tehnika jumyldyrylǵan.
«Jasóspirimniń erekshe belgileri: boiy 140-150 sm, dene bitimi aryqtaý, shashy qara. Ústinde qyzyl tústi kýrtka, sary tústi syrmaq shalbar, qara qalpaq, aiaǵynda qara qystyq aiaq kiim bar. Izdeý jumystary Politsiia departamenti bastyǵynyń qatań baqylaýynda. Aýa raiynyń kúrt ózgerýi izdestirý jumystaryn qiyndatýda. Joǵalǵan jasóspirim týraly qandai da bir aqparat anyqtalǵan jaǵdaida Qyzylorda oblysy politsiia departamentine, Qazaly aýdandyq politsiia bólimine «102» arnasyna, 8 (72438)21-5-17, 8-702-884-68-88, 8-702-892-05-01 shuǵyl túrde habarlasýlaryńyzdy suraimyz. Qazirgi ýaqytta izdestirý jumystary jalǵasýda», - dep málim etti Qyzylorda oblystyq politsiia departamentinen.
Departament mamandary oblys turǵyndarynan balalardyń qaýipsizdigin qamtamasyz etý maqsatynda baqylaýdy kúsheitýge nazar aýdarý qajettigin eske salady.
Sondyqtan mal baǵý jáne ózge jumystarǵa aralastyrmaýdy suraidy.
