Qyzylorda oblysynda koronavirýs jaiynda jalǵan aqparat taratqan turǵyndar anyqtaldy, dep habarlaidy "Ult aqparat".
Alǵashqy derek Aral aýdanynda tirkelgen. Onda belgisiz áiel WhatsApp jelisindegi «Klastastar» chatyna «Koronavirýs Bekbaýyldan shyqty, Aralǵa alyp kelip jatyr» dep aýdiojazba arqyly jalǵan habar taratqan.
Ekinshi derekte Jańaqorǵanda belgisiz áiel WhatsApp jelisi arqyly «Aǵaiyndar» chatyna syrqattanbaǵan aýdan turǵynynyń naqty aty-jónin aityp, onyń koronavirýs juqtyrǵanyn aitqan. Bul aýdiojazba da politsiia nazaryna ilikti.
«Bul derekter dereý tekserildi. Jedel izdestirý nátijesinde messendjer arqyly jalǵan aqparat taratqan turǵyndar anyqtaldy. Olardyń biri Aral aýdanynyń 33, ekinshisi Jańaqorǵan aýdanynyń 50 jastaǵy turǵyndary ekeni anyqtaldy. Ustalǵan kúdiktiler óz áreketterin tolyq moiyndap, ókinetindigin aitty. Atalǵan derekter boiynsha QR Qylmystyq kodeksiniń 274-baby 4 bóligimen (tótenshe jaǵdai kezinde kórineý jalǵan aqparat taratý) sotqa deiingi tergep-tekserý jumystary júrgizilip jatyr», - dep málim etti Qyzylorda oblystyq politsiia departamentiniń baspasóz qyzmeti.
Qazirgi tańda Qyzylorda oblysynda koronavirýs juqtyrǵan 25 adam bar.
