Qyzylorda qalasynda turmysy tómen kópbalaly otbasylarǵa arnalǵan 100 baspana paidalanýǵa berildi.
Birer ai buryn oblys ortalyǵyndaǵy «Báiterek» shaǵyn aýdanynda turmysy tómen kópbalaly otbasylar úshin 150 baspananyń qurylysy bastalǵan bolatyn. Onyń ishinde 50 páter jergilikti qazynadan bólingen qarjyǵa salynýda. Al 100 baspananyń qurylysy «Bolat Ótemuratov» qaiyrymdylyq qorynyń qarjysy esebinen júrgizildi. Sol 100 páter qysqa merzimde salynyp, el igiligine paidalanýǵa berilgeli otyr. Sondyqtan, búgin munda jinalǵan halyqtyń qarasy qalyń boldy. Jańa mekenniń alǵashqy qonystanýshylary – kópbalaly otbasylar, olardyń qýanyshyna ortaqtasýǵa kelgen el azamattary, qala turǵyndary keldi. Shańyraq shattyǵyna bólengeli otyrǵandarǵa óńir ónerpazdary da merekelik kóńil-kúi syilady.
Saltanatty jiynǵa oblys ákimi Qyrymbek Kósherbaev pen «Bolat Ótemuratov» qaiyrymdylyq qory Qamqorshylyq keńesiniń tóraǵasy Almas Sharman qatysyp, qonystoi ielerin quttyqtady.
«Sońǵy jyldary Syr óńiri qarqyndy qurylys alańyna ainalyp kele jatyr. 2013 jyly 230 myń sharshy metr baspana salynsa, biylǵy mejemiz 800 myń sharshy metrge jetip otyr. Tórt esege ósken. Qoǵam qairatkeri Bolat Ótemuratovtyń qarjylyq demeýshiligimen «Balameken» jobasy aiasynda Qyzylorda qalasynda az qamtamasyz etilgen kóp balaly otbasylardy qoldaý maqsatynda jáne balalardy qorǵaý merekesi qarsańynda 100 páterdiń qurylysy rekordtyq eki ai merzimde salynyp, paidalanýǵa berildi. Qosymsha oblystyq biýdjetten 50 páterge qarjy bólinip, qurylysy júrýde. Olar da tolyqqandy maýsym aiynda iske qosylady. Aita ketý kerek, turǵyn úi qurylysyn damytý maqsatynda sońǵy 6 jyl ishinde Qyzylorda qalasynyń ózinde 15 shaǵyn aýdan paida boldy. Jańa aýdannyń qurylysyna kiristik. Qyzylorda tarihynda mundai qarqyndy qurylys bolǵan emes. 2019 jyldyń sońyna qarai Qyzylordanyń sol jaǵalaýynda 2 628 páterlik 13 kópqabatty turǵyn úi salyp, oǵan 13 myń adamdy qonystandyrýdy josparlap otyrmyz. Elbasynyń 2018 jyldyń qańtaryndaǵy joldaýyna orai, bolashaqta bir adamdy 30 sharshy metr baspanamen qamtamasyz etý josparymyzda bar», – dedi Qyrymbek Kósherbaev.
«Báiterek» shaǵyn aýdanynda paidalanýǵa berilgeli otyrǵan baspanalardyń jalpy aýdany – 6 500 sharshy metr.
Oblys ákiminiń aitýynsha, salynyp jatqan 150 baspananyń 149-yna kópbalaly otbasylar qonystanady. 1-eýine shaǵyn halyq qyzmet kórsetý ortalyǵy ornalaspaq. Ol kópbalaly otbasylarǵa jáne osyndaǵy jeke úilerge qyzmet kórsetedi. Sonymen qatar, aimaq basshysy aldaǵy jyly «Báiterek» shaǵyn aýdanyna mektep pen balabaqsha qurylysyn salýdy josparǵa engizetinin aityp, turǵyndardy qýantyp qoidy.
«Budan bólek, Qyzylorda oblysynda az qamtylǵan kópbalaly otbasylarǵa 431 páterdiń qurylysyna biýdjetten qarjy bólinipti. Jyldyń sońyna deiin 588 páter kópbalaly otbasylarǵa beriletin bolady», – dedi oblys ákimi.
«Bolat Ótemuratov» qory Qamqorshylyq keńesiniń tóraǵasy Almas Tóregeldiulynyń aitýynsha, memleket tarapynan ǵana emes, biznes ókilderi tarapynan da halyqtyń áljýaz toptaryna qoldaý kórsetilýde. Sonyń bir dáleli – «Bolat Ótemuratov» qorynyń eldiń ál-aýqatyn artyrý baǵytynda atqaryp otyrǵan jumystary.
«5 jyl buryn irgesi qalanǵannan beri osy baǵytta jumysyn úzdiksiz jalǵastyryp keledi. Qordyń quryltaishysy Bolat Ótemuratov óz tarapynan kópbalaly otbasylardy baspanamen qamtamasyz etýge óz úlesin qosýdy uiǵardy. Bizdiń qorymyz 450 million teńge kóleminde qarajat bólip, Qyzylorda oblysy ákimdigimen birge naýryz aiynda «Balameken» jobasyn iske asyrýǵa kiristi. Búginde josparymyz tabysty bolǵanynyń kýási bolyp otyrmyz. Sol sebepti, kópbalaly analar, balalar jaily baspananyń iesi bolatynyn erekshe tebirenispen, úlken qýanyshpyn aitqym keledi», – dedi Almas Sharman.
Budan keiin el azamattary kópbalaly otbasylarǵa páter kiltterin saltanatty túrde tabystady. Baspanaǵa birinshi kezekte qol jetkizgender – 10, 9, 8, 7 balasy bar otbasylar. Depýtattar men qoǵam belsendilerinen quralǵan táýelsiz komissiia osyndai sheshim qabyldapty.
Máselen, jańa páter alǵan Aigúl Abaidýllaeva – 10 balanyń anasy. Baspanaly bolsam degen armany oryndalǵany sene alar emes. Tipti kóz jasyna erik berdi.
«Qatty qýanyp turmyn. Shiittei bala-shaǵa bar. Solardyń nesibesi dep bilemin. Ramazan aiynda osyndai syi násip etti», – deidi ol.
Al 7 balanyń anasy Vera Júsipova páter jaldap, kóship-qonyp júretin kúnder artta qaldy dep otyr.
«Jaryq, sý, gaz, jol, telefon bailanys – bári bar mynda. Rizamyz. Jalpy, otbasymnyń turmys jaǵdaiymen ákimshiliktegi adamdar tanys. Baspanaǵa muqtaj ekenimizdi de biledi. Keshe úi beremiz dep habarlasqanda qýanyp kettim. Týystaryma aityp, súiinshi surap, máz bolystyq», – deidi kópbalaly ana.
7 balanyń anasy Izimkúl Tursanova da qýanyshynda shek joq ekenin aitady.
«Balameken» degen jobanyń arqasynda kóp jyl kútken páterimizdi aldyq. Endi osy jer balalar mekenine ainalady dep oilaimyn. Elbasyna, oblys basshylyǵyna osyndai qamqorlyq kórsetip jatqanyna alǵys aitamyn», – dedi Izimkúl Tursanova.
Ibrash Áli, Baq.kz
