Para alǵany úshin aiyptalǵan qalalyq Politsiia basqarmasynyń burynǵy basshysy 7 jylǵa bas bostandyǵynan aiyryldy, - dep habarlaidy Tengrinews.kz tilshisi №2 qalalyq sottyń baspasóz qyzmetine silteme jasap.
Vedomstvo málimetinshe, Qyzylordada 13 sáýirde ashyq sot otyrysynda qalalyq Politsiia basqarmasynyń burynǵy basshysyna qatysty qylmystyq is qaraldy.
"Sot qylmystyq is boiynsha sottalýshy paida tabý úshin politsiia kapitany B.-ny qýdalaimyn dep qorqytyp, odan 50 000 teńge talap etkenin anyqtady. Qylmystyq nietin áshkerelep almaý úshin qol astyndaǵy qyzmetkerlerine qolma-qol aqsha ákelip berýdi tapsyrǵan. Jábirlenýshi B. aqshasy bolmai, áriptesinen suraǵan. Ol bas tartqan. Ol amalsyzdan aqshalai kómektesken áieline júgingen. Osydan keiin B. kóliginde burynǵy bastyǵyna qolma-qol 50 000 teńge bergen", - dedi vedomstvonyń baspasóz qyzmeti ókili.
Sotta sottalýshynyń kinási zattai dáleldemelermen jáne istegi basqa da qujattarmen, sot saraptamasynyń qorytyndylarymen, júrgizilgen arnaiy jedel-izdestirý is-sharalarynyń nátijelerimen, qaraý hattamalarymen, jábirlenýshiden, kýádan jaýap alýmen rastalǵanyn atap ótti.
"Sotta prokýror sottalýshyny QK-niń 366-baby 3-bóligi 1-tarmaǵy boiynsha kináli dep tanýdy jáne qaýipsizdigi barynsha tómen mekemelerde jazasyn ótep, memlekettik qyzmette ómir boiy qyzmet atqarýdan aiyryp, 7 jyl bas bostandyǵynan shekteýdi, sondai-aq podpolkovnik sheninen aiyrýdy surady. Sottalýshynyń advokaty ony aqtady", - dedi baspasóz qyzmetkeri.
Sot úkimimen sottalýshy QK-niń 366-baby 3-bóligi 1-tarmaǵynda kózdelgen "Bopsalaý arqyly para alý" qylmysyn jasaǵany úshin kináli dep tanyldy.
"Sottalýshyǵa qaýipsizdigi tómen mekemelerde jazasyn óteý, 7 jylǵa bas bostandyǵynan aiyrý jazasy taǵaiyndaldy, sondai-aq sot ony podpolkovnik sheninen aiyrdy. Onyń ómir boiy memlekettik qyzmette jumys isteýine tyiym saldy", - dep tolyqtyrdy qalalyq sottyń baspasóz qyzmeti ókili.
