Foto: Gov.kz
Qyzylordada QR Mádeniet jáne aqparat ministrliginiń qoldaýymen «Tárbie tal besikten» atty IH Respýblikalyq ákeler forýmy ótti, dep habarlaidy Ult.kz.
Oǵan respýblikalyq Ákeler odaǵynyń óńirlik basshylary, ziialy qaýym ókilderi, otbasy saiasaty salasyndaǵy sarapshylar, halyqaralyq uiymdardyń, jergilikti atqarýshy organdardyń, ÚEU ókilderi – jalpy 200-ge jýyq adam qatysty. Kezdesý taqyryby Memleket basshysynyń óz Joldaýynda bergen baǵdaryna súiene otyryp aiqyndaldy.
«Memleket basshysy Qasym-Jomart Toqaev biylǵy joldaýynda «Mektepke deiingi tárbie berý jáne oqytý isine memleketpen qatar ata-analarda jaýapty» degeni belgili. Otbasy – óskeleń urpaq qundylyqtarynyń qalyptasýynyń negizgi kózi. Bul bazalyq áleýmettik institýt, onyń jumys isteýi memlekettiń ál-aýqaty men turaqtylyǵyna tikelei áser etedi», – dedi QR MAM Jastar jáne otbasy isteri komiteti tóraǵasynyń orynbasary Birjan Álimjanov.
Foto: Gov.kz
Forýmnyń maqsaty – ákeler men otbasy institýtyn damytý, balalardy tárbieleýdegi ákeler róliniń mańyzyn anyqtaý, sondai-aq tárbie berýde tájiribe almasý.
Forýmda «Er adamnyń beinesin qalyptastyrýdaǵy ákeniń róli: jaýapkershilik, batyldyq, qurmet», «Otbasy jáne qaýipsizdik», «Sanaly túrde ata-ana bolý», «Erler úshin sport pen densaýlyqtyń mańyzy» atty taqyryptar aiasynda birqatar talqylaýlar ótkizildi.
Sondai-aq, forýmnyń ár qatysýshysy otandyq baspager, Forbes Kazakhstan jýrnalynyń qazaq tilindegi bas redaktory Baqytjan Buqarbaidyń «Zamanmen sanasqan 30 ákeniń hikaiasy» atty kitabyn syilyq retinde aldy. Kitapta bala tárbiesi týraly búgingi ákelerdiń áńgimeleri men oilary jinaqtalǵan.
