Qyzylorda oblysynyń Sybailas jemqorlyqqa qarsy qyzmeti 2020-2021 jyldary teris nátijesi bar COVID-19 PTsR synamalarynyń sertifikatyn satýmen ainalysqan eki meditsinalyq mekemeniń qyzmetkerlerine qatysty qylmystyq isti tergeýde, dep habarlaidy "Ult aqparat" vedomstvonyń Telegram kanalyna siltememen.
PTsR synaǵynyń sertifikattary ár túrli maqsattarda paidalanýǵa arnalǵan: vahtalyq ádispen jumys isteitin jumysshylar, shetelge saiahattaityn adamdar, Baiqońyr qalasyna kiretin jáne t.b.
Sonymen birge, meditsina qyzmetkerleri 1 anyqtama úshin 7 myń teńge kóleminde zańsyz syiaqy alǵan. Olar bul aqshany Ulttyq saraptama ortalyǵy oblystyq filialynyń laýazymdy tulǵalaryna para berý qajettiligin syltaýratyp alyp otyrǵan.
Aǵymdaǵy jyldyń basynan beri Qyzylorda oblysynyń turǵyndaryna PTsR testisinen ótkendigi týraly 60 jalǵan kýálik anyqtaldy.
Osylaisha, meditsina qyzmetkerleriniń qylmystyq is-áreketteriniń kesirinen oblys azamattaryna dert juǵý qaýpi tóngen.
Jedel izdestirý kezinde PTsR COVID-19 synamalarynyń jalǵan sertifikattary jasalǵan kompiýterlik jabdyq pen mór tárkilendi.
Meditsina qyzmetkerleri kinásin tolyq moiyndaýyna bailanysty qamalǵan joq.
Tergeý múddelerine qatysty basqa aqparat jariia etilmeidi.
