Foto: Facebook jelisinen
Qyzylordada onkologiialyq ortalyq dárigeri jynystyq qatynasqa túsýden bas tartqan medbikeni soqqyǵa jyqqan, - dep habarlaidy Tengrinews.kz tilshisi.
Bul oqiǵa týraly belsendi Zhamilya Kassymkhan Facebook áleýmettik jelisindegi qyzylordalyq topta jazdy. Belsendiniń aitýynsha, oqiǵa 2022 jyldyń 3 naýryzynda onkologiialyq ortalyqta bolǵan. Jazbada aqyly hirýrgiia bóliminiń hirýrgi A.K. men reanimatolog M.A. túngi aýysymda ishimdik ishkeni aitylǵan.
"Túngi aýysym. Reanimatolog M.A. medbike A-ny 5-qabattaǵy basqa blokqa shaqyryp, seksýaldyq sipattaǵy áreketter jasai bastaidy. Medbike tóbelesip, onyń qolyn tistep alaǵan. Biraq reanimatolog qushtarlyǵyn kórsetýdi toqtatpaǵan. Qyz bul áreket jumys ornynda jábirleý ekenin aitqan, biraq mas reanimatolog toqtamai, ony uryp-soqqan. Bas tartqany úshin qyzdy baspaldaqtan iterip jibergen. Qoryqqan qyz qashýǵa tyrysady, biraq ol úndemeýdi buiyrǵan, áitpese jumystan ketedi. Keiin ol medbikege birneshe ret telefon soǵyp, muz ákelýin suraǵan. Sondai-aq, massaj jasaý úshin basqa medbikeni shaqyrǵan", - dep jazdy jazba avtory.
Odan ári Zhamilya Kassymkhan dál osy ýaqytta mas kúidegi hirýrg A.K naýqasqa shyqpaq bolǵanyn jazady. Basqa medbikeler ony tynyshtandyrýǵa tyrysqan. Dárigerlerdiń áreketi jaily estigen oblystyq onkologiia dispanseriniń emdeý bólimi direktorynyń orynbasary túnde kelip, mas hirýrgtardy kórgen, biraq eshqandai shara qoldanbaǵan.
"Túrli bólimshe medbikelerimen sóileskennen keiin, bul dárigerler túngi aýysymda intim massaj jasaýǵa, jumys ornynda jynystyq qatynasqa túsýge kóndiretinin bildim. Bári úndemeidi, qorqady. Medbike A., direktor men onyń orynbasaryna, odan keiin oblystyq densaýlyq saqtaý basqarmasy men politsiiaǵa aryz jazǵan. Esh jerde qarastyrylmaǵan. Keshe qyz 102-ge habarlasqan kezde ǵana politsiia aryzdy tirkegen", - dep qosty ol.
Qyzylorda oblystyq onkologiialyq ortalyq bul oqiǵadan habardarmyz dep jaýap berip, oqiǵa boiynsha qyzmettik tekseris júrgizilgenin aitty.
"Siz sipattaǵan oqiǵa boiynsha 2022 jyldyń 15 naýryzynda medbike A-nyń anasy aryzdanǵan. Osyǵan bailanysty qyzmettik tekseris júrgizý úshin komissiia quryldy. 16 naýryzda dárigerler A.M. jáne K.A-men eńbek sharty buzyldy. Siz bergen aqparat jalǵan (bul dárigerler jumysyn jalǵastyryp jatyr degen). Qylmys týraly aryzǵa kelsek, bul máseleni qaraý Oblystyq onkologiialyq ortalyq quzyretine jatpaidy, osyǵan bailanysty quqyq qorǵaý organdaryna habarlasyńyz", - dedi onkologiialyq ortalyq ókilderi.
Qyzylorda oblysynyń Politsiia departamenti aryz boiynsha Qyzylorda qalalyq PB tekserý sharalaryn júrgizip jatqanyn habarlady.
