Qyzylorda oblysynyń Jańaqorǵan aýdanynda dala órti saldarynan 700 usaq mal qyryldy, dep habarlady QR TJM resmi ókili Talǵat Ýáli.
«2020 jyly 21 qazanda saǵat 18.50-de Qyzylorda oblysy Jańaqorǵan aýdany Aqqorǵan aýyldyq okrýginiń Túgisken aýylynda shamamen 30 gektar bolatyn shabylǵan kúrish alqabynda qurǵaq saban órtengen. Órt sol kúni saǵat 21.48-de tolyq sóndirildi. Órtti sóndirýge TJD men eriktilerden quralǵan 19 adam men 5 tehnika jumyldyryldy», - dep málimdedi QR TJM resmi ókili Talǵat Ýáli.
Aldyn ala boljam boiynsha órt saldarynan jeke sharýa qojalyǵyna tiesili jaiylyp júrgen 700-ge jýyq qoi órtenip ketken. Odan bólek, kúiip qalǵan usaq mal bar. Olardyń naqty sany anyqtalýda. Oqiǵa ornynda arnaiy qurylǵan komissiia jumys istep jatyr.
