Qyzylorda oblysynda belgili boksshy Qamshybek Qońqabaevqa merekelik medal tabys etildi, dep habarlaidy QazAqparat tilshisi.
Búgin el Táýelsizdiginiń 30 jyldyǵyna orai Qyzylorda oblysynda mádeniet, sport, din, buqaralyq aqparat quraldary salasynda qajyrly eńbek etip júrgen úzdikterge «QR Táýelsizdigine 30 jyl» merekelik medali tabystaldy.
Saltanatty sharaǵa oblys ákiminiń orynbasary Serik Ahmet qatysyp, ulyq merekemen quttyqtady.
«Eldik pen erkindiktiń bastaýy bolyp tabylatyn osy saltanatty kúni Sizderge igilik pen baqyt, baq-dáýlet, yrys tileimin. Elbasy aitqandai, ár qazaqstandyq aldaǵy ýaqytta onyń tuǵyryn nyqtap, eńsesin tiktep, abyroiyn asyrýǵa qyzmet etýge tiis. «Máńgilik el» ideiasynyń túpki maqsaty osynda. Eń bastysy, elimiz aman, urpaǵymyz azat. Biz alaqanǵa salyp ósirgen sol azat urpaq endigi jerde «Men Qazaqstanyma ne beremin?» degendi oilaýy kerek». Qazaqstannyń turaqty damýy men kemeldenýi jolyndaǵy eńbekterińiz tabysty, barlyq bastamalaryńyz sátti bolsyn! Yntymaqty - uran, tatýlyqty - tý etken qazaq eliniń abyroiy arta bersin», - dedi oblys ákiminiń orynbasary Serik Ahmet.
Saltanatty sharada merekelik medal bokstan Tokio Olimpiadasynyń qola júldegeri Qamshybek Qońqabaev, jazýshy-ekolog Sailaýbai Jubatyruly, aitysker, aqyn Serik Ydyrysov, Syr jýrnalistikasynda ózindik qoltańbasy bar birqatar qalamgerler jáne basqarma basshylaryna tabystaldy.
