Qyzylorda oblysynda biyl qazaq halqynyń kórnekti tulǵasy Abaidyń 175 jyldyǵyna arnalǵan mádeni is-sharalar jospary naqtylandy, dep habarlaidy "Ult aqparat".
Uly aqynnyń mereitoilyq sharasy Nartai Bekejanov atyndaǵy Qyzylorda oblystyq qazaq akademiialyq mýzykalyq drama teatrynda «Abai» spektaklimen bastaldy. Bul spektakl jyl boiy júrgiziledi. Sondai-aq, Á.Tájibaev atyndaǵy Qyzylorda oblystyq ámbebap ǵylymi kitaphanasynda «Kemeńgerliktiń biik shyńy - Abai» taqyrybymen keńeitilgen turaqty kórme ashyldy.
«Endi 12 aqpan kúni C. Aitbaev atyndaǵy kórkemsýret galereiasynda «Qanat jaiǵan rýhaniiat» atty taqyryptyq kórme jumysyn bastaidy. Kórkemsýret galereiasynda 21 aqpannan bastap Semei qalasynan arnaiy shaqyrtýmen Abaidyń «Jidebai-Bórili» memlekettik qoryq-mýzeiiniń «Abai - dana, Abai - dara qazaqta» kóshpeli kórmesi kópshilik nazaryna usynylady. Bul shara oblys halqynyń Abai álemimen jaqyn tanysýyna jaǵdai jasaý maqsatynda qolǵa alynady. Al 27 aqpan kúni «Danalyqqa qurmet, erlikke taǵzym» atty respýblikalyq aqyndar aitysy ótkizilse, Syr óńirinde alǵash ret Ahmet Jubanov, Latif Hamidi «Abai» operasynan úzindi qoiylyp, «Kózimniń qarasy» atty oblystyq vokalister konkýrsy, «Uly dala yrǵaqtary» atty Abai ánderine qoiylǵan oblystyq bi baiqaýy bolady», - dedi oblystyq mádeniet, muraǵattar jáne qujattama basqarmasynyń basshysy Mira Ábýova.
Basqarma basshysynyń aitýynsha, odan keiingi kezekte «Uly halyqtyń - Uly Abaiy», «Abai dara, Abai dana qazaqta», «Álemge tanylǵan Abai», «Kemeńgerliktiń biik shyńy – Abai», «Asyl sózdi izdeseń, Abaidy oqy erinbe» atty kitap kórmeleri men ádebi keshteri, Turmaǵambet atyndaǵy halyq aspaptar orkestriniń «Abaidyń án álemi» atty kontsertin ótkizý josparlanyp otyr.
Budan buryn Qyzylordada «Abai qazynasyna saiahat» klýby ashyldy.
