«100 jańa oqýlyq: zamanaýi memlekettik basqarý júiesi jáne strategiialyq josparlaý» TALKS formatyndaǵy kezdesý barysynda úzdik oqýlyqtardy qazaq tiline aýdarýdaǵy jobanyń artyqshylyqtary aityldy.
Sharaǵa oblys ákimi Qyrymbek Kósherbaev, «Ulttyq aýdarma biýrosy» qoǵamdyq qory men jergilikti atqarýshy organdarynyń ókilderi qatysty.
Qyzylorda oblysynyń ákimi Qyrymbek Kósherbaev kezdesýdiń ashylýynda sóz alyp, «Jańa gýmanitarlyq bilim. Qazaq tilindegi 100 jańa oqýlyq» jobasynyń qazaqstandyq stýdentterdiń bilim sapasyn arttyrýdaǵy mańyzdylyǵyn atap ótti.
«Jahandaný zamanynda árbir ulttyń ózin-ózi tanýǵa umtylýy – zańdylyq. Osy rette memleket basshysynyń «Bolashaqqa baǵdar: rýhani jańǵyrý» atty baǵdarlamalyq maqalasy elimiz úshin rýhani silkinis jasaǵan tyń bastama boldy. Osy maqsatta «Rýhani jańǵyrý» baǵdarlamasyn Qyzylorda oblysynda iske asyrýǵa baǵyttalǵan is-sharalar jospary bekitilip, josparǵa sáikes Syr óńirinde 600-den astam is-sharalar uiymdastyrylyp, birqatar áleýmettik jobalar júzege asyrylyp jatyr. Sonymen qatar, jas urpaqtyń básekelik qabiletin arttyrý, aqparattyq jáne sandyq tehnologiialardy igerý, zaman talabyna sai ziiatker urpaq tárbieleý – bizdiń negizgi mindetimiz», - dedi aimaq basshysy.
«Jańa gýmanitarlyq bilim. Qazaq tilindegi 100 jańa oqýlyq» jobasy aiasynda qazaq tiline aýdarylyp jatqan oqýlyqtar týraly «Ulttyq aýdarma biýrosynyń» direktory, Bilim Media Group kompaniiasynyń negizin qalaýshy Raýan Kenjehanuly baiandama jasap, kezdesýge qatysýshylardyń suraqtaryna jaýap berdi.
«Barlyq oqýlyqtardy «Qazaqstannyń ashyq ýniversiteti» - openu.kz portalynan taba alasyzdar. Budan basqa, biz qazaq jáne orys tilderindegi árbir oqýlyqtyń onlain dáristerin osy kitaptardyń mazmunyna qol jetkizýdiń taǵy bir úlgisi retinde engizýdi josparlap otyrmyz. Dáristiń mátinderin tyńdap ári konspekt túrinde oqýǵa múmkindik bolady», - dedi Raýan Kenjehanuly.
Onyń aitýynsha, qazirgi tańda taǵy da 30 oqýlyqty aýdarý boiynsha jumys júrgizilip jatyr.
Esterińizge sala keteiik, «Jańa gýmanitarlyq bilim. Qazaq tilinde 100 jańa oqýlyq» jobasynyń aiasynda álemdegi úzdik 18 oqý quraly qazaq tiline aýdaryldy.
Filosofiia, áleýmettaný, psihologiia, ekonomika, menedjment, biznes, dintaný, lingvistika, mádeniet, antropologiia jáne jýrnalistika pánderi boiynsha oqýlyqtar 110 qazaqstandyq joǵary oqý ornynyń kitaphanasyna jiberildi. Solardyń qatarynda Qorqyt ata atyndaǵy Qyzylorda memlekettik ýniversitetiniń kitaphanasy da bar.
