Qyzylorda oblysynyń Jańaqorǵan aýdany karantinge jabylady. Bul jóninde aimaq ákimi Gúlshara Ábdiqalyqovanyń aimaqta koronovirýs indetinen qalyptasqan jaǵdaiǵa bailanysty turǵyndarǵa úndeýinde aityldy, dep habarlaidy "Ult aqparat".
«Qazirgi ýaqytta Qyzylorda oblysynda koronovirýs indetimen aýyrǵan 18 azamat tirkeldi. Jaǵdai kúrdelene túsýde. Qazirgi tańda bul azamattardyń 5-eýi oblystyq juqpaly aýrýlar aýrýhanasyna, 13-i Janaqorǵan aýdanaralyq aýrýhanasyna jatqyzyldy. Osy naýqastarmen qarym-qatynasta bolǵan 388 adam anyqtaldy. Onyń ishinde 101-i tyǵyz qarym-qatynasta bolǵan. Barlyq azamattar karantindik baqylaýǵa alyndy. Negizinen eń alǵashqy anyqtalǵan adammen qarym-qatynasta bolǵan naýqas arqyly 13 adamǵa virýs juqqan» - dedi oblys ákimi.
Atap ótilgendei, búgin jańadan tirkelgen 9 adamnyń 8-i bir úidiń turǵyndary. Onyń ishinde 3-eýi 14 jasqa deiingi balalar.
«Qazir barlyq qajetti is-sharalar qolǵa alynýda. Qarym-qatynasta bolǵan adamdar anyqtalyp, oqshalanýda. Indet anyqtalǵan jerler áskeriler men jergilikti mekemeler arqyly zalalsyzdandyrylady. Qalyptasqan jaǵdaiǵa bailanysty Jańaqorǵan aýdanyn karantinge jabý týraly tapsyrma berildi. Kólikterdiń kirip-shyǵýyna barynsha shekteý qoiylýy tiis. Azamattardyń qaýipsizdigi úshin osyndai sharalar qoldanýymyz qajet», - dedi G.Ábdiqalyqova.
«Qurmetti qyzylordalyqtar, koronovirýs indetiniń taralýynyń aldyn alý talaptaryn qatań saqtaýǵa tiispiz. Qazir kez kelgen adam virýs juqtyrýy múmkin. Barlyq turǵyndar dertten oqshaýlanǵany durys. Eldi jónsiz dúrliktirmes úshin resmi aqparattarǵa súienýimiz qajet. Tótenshe jaǵdai talaptaryn buzǵandarǵa zań aiasynda qatań sharalar qoldanylatynyn eskertemin», - dedi aimaq basshysy.
Óńirdiń Bas sanitarlyq dárigeriniń qaýlysyna sáikes 2020 jyldyń 31 naýryzy saǵat 00:00-den bastap, 2020 jyldyń 15 sáýiri saǵat 07:00-ge deiin Qyzylorda qalasynda karantin jáne Qyzylorda oblysy aýmaǵy boiynsha shekteý sharalary engiziledi.
Osy ýaqytta oblysta koronavirýs indetiniń rastalǵan 18 oqiǵasy tirkeldi.
