Qyzylorda qalasynyń №2 sotynda oblystyń burynǵy basshysy Qýanyshbek Ysqaqovqa qatysty úkim shyǵaryldy. Onymen birge taǵy tórt adam jaýapqa tartyldy.
"Sottalýshy Qýanyshbek Ysqaqovqa jeti jylǵa bas bostandyǵynan aiyrý jazasy belgilensin", - dedi sýdia.
Eks-ákim jazany qaýipsizdigi ortasha deńgeidegi mekemede óteidi.
Ysqaqov Qylmystyq kodekstiń 190-baby, 4-bóliminiń 2-tarmaǵy – qyzmet babyn paidalanyp, asa iri kólemde alaiaqtyq jasaǵany úshin kináli dep tanyldy. Onymen birge eki orynbasary men kásipkerler de sottaldy. Burynǵy orynbasarlary Murat Imandosov pen Marat Delmuzanov alty jylǵa bas bostandyǵynan aiyrylsa, kásipkerler Jeńisbek Ysqaqov pen Azat Dosmaiylov bes jylyn túrmede ótkizedi.
Tergeý materialdaryna sáikes, Qyzylorda oblysy ákimdiginiń laýazymdy tulǵalary "Syr meiirimi" qoǵamdyq-áleýmettik qoryna tiesili 80 million teńge (190 myń dollar) kólemindegi qarajatty jymqyrǵan. Ol aqsha Arys qalasyn qalpyna keltirýge arnalǵan bolatyn.
Ysqaqov qyzmet babyn paidalanyp alaiaqtyq jasaǵan. Al onyń eki orynbasary men eki kásipker bul qylmysty jasaýǵa kómektesken.
Sotta Ysqaqov sońǵy sózin aitqanda kinásin moiyndaǵan joq. Arys qalasyna arnalǵan qarajatqa da, "Syr meiirimi" qoryna da esh qatysym joq dedi.
"Kýálardyń jalǵan aiǵaqtary men jábirlenýshi Ábdirahimovanyń jalǵan qujaty negizinde aiyp taǵylyp otyr", - dep atap ótti ol.
Prokýratýra eks-ákimdi segiz jylǵa, eki orynbasarynyń árqaisyn jeti jylǵa, al kásipkerlerdi alty jylǵa bas bostandyǵynan aiyrýdy suraǵan bolatyn.
