Qyzylorda oblysynyń burynǵy ákimi Qýanyshbek Ysqaqov jazasynyń ótelmegen bóligi bas bostandyǵyn shekteý jazasymen aýystyryldy, dep habarlaidy QazAqparat.
Aita ketsek, Ysqaqov 2020 jyldyń jeltoqsanynda Qyzylorda qalasy №2 sotynyń úkimimen QR Qylmystyq kodeksiniń 190-baby 4-bóligi 2-tarmaǵymen kináli dep tanyldy. Memlekettik qyzmetpen ainalysý quqyǵynan ómir boiyna aiyrylyp, 7 jylǵa sottalǵan.
Sondai-aq, jazasyn qylmystyq-atqarý júiesiniń ortasha qaýipsiz mekemelerinde óteý belgilengen. Jaza óteý merzimi 2020 jyldan bastap eseptelgen.
«Úkim Qyzylorda oblystyq sotynyń qylmystyq ister jónindegi sot alqasynyń qaýlysymen ózgerissiz qaldyryldy, Al QR Joǵarǵy Sotynyń qylmystyq ister jónindegi sot alqasynyń qaýlysymen jaza taǵaiyndaý bóligi ózgertildi. Bas bostandyǵynan aiyrý jaza merzimi 6 jyl merzimge deiin tómendetildi. Qýanyshbek Ysqaqov sottan jazasynyń ótelmegen bóligin neǵurlym jeńil jaza túrimen, iaǵni aiyppul túrine nemese bas bostandyǵyn shekteý jazasyna aýystyrýdy suraǵan. Sotta ZK-169/5 mekemesi RMM-niń ókili sottalǵanǵa berilgen minezdemeni qýattap, jazasyn óteý barysynda belgilengen ishki kún tártibi erejelerin jáne rejim talaptaryn buzýshylyǵy bolmaǵanyn atap ótti. Oǵan qosa eki kótermeleý sharasy qoldanylǵanyn, jazalaý sharasy joq ekenin, jeńildetilgen jaǵdaida ustalatynyn, dárejesi ekinshi oń minez-qulyqty dep aiqyndalǵanyn málimdedi», - dep málim etti Qyzylorda qalasynyń №2 sotynan.
Vedomstvo málimetinshe, sot úkimi boiynsha, talap aryz negizinde óndirilgen qylmyspen keltirilgen múliktik zalal, memleket paidasyna memlekettik baj shyǵyny, memleket paidasyna protsestik shyǵyn, ótemaqy qory tolyq ótelgenin, jazany óteýdiń belgilengen tártibin qaskóilikpen buzbaǵany kórsetilgen.
Jábirlenýshi ókili jazanyń ótelmegen bóligin neǵurlym jeńil jaza túrine aýystyrý týraly ótinishhatyna qarsy emes ekendigin bildirdi.
«QR Qylmystyq kodeksiniń 73-baby 1-bóligine sai onsha aýyr emes, aýyrlyǵy ortasha nemese aýyr qylmys úshin bas bostandyǵynan aiyrýdy ótep jatqan adamǵa, ol qylmyspen keltirilgen zalaldy tolyq ótegen ne jazany óteýdiń belgilengen tártibin qaskóilikpen buzbaǵan jaǵdaida, sot jazanyń qalǵan ótelmegen bóligin neǵurlym jeńil jaza túrimen aýystyrýy múmkin. Osy negizben sottalǵan Qýanyshbek Ysqaqovtyń jazasynyń ótelmegen bóligin neǵurlym jeńil jaza túrine aýystyrý týraly ótinishhaty qanaǵattandyryldy. Jazasynyń ótelmegen bóligi (3 jyl 11 ai 12 kún) merzimi, jazanyń qosymsha túrin óteýden bosatýsyz, jazanyń neǵurlym jeńil túri bas bostandyǵyn shekteý jazasymen aýystyryldy», - dep tolyqtyrdy Qyzylorda qalasynyń №2 soty.
