Búgin Úkimet otyrysynda Qyzylorda oblysynyń ákimi Qyrymbek Kósherbaev oblystyń 2022 jylǵa deiingi Keshendi damý josparyn tanystyrdy. Otyrystyń qorytyndysymen qujat bekitildi.
Óńirdi damytýdyń keshendi jospary 12 baǵyt, 119 is-sharadan turady. Olar - ónerkásip, agroónerkásiptik keshen, kásipkerlikti damytý, kólik infraqurylymy, turǵyn úi kommýnaldyq sharýashylyǵy, ekologiia jáne tabiǵatty paidalaný, halyqty áleýmettik qorǵaý, densaýlyq saqtaý, sport, sý tasqynyna qarsy is-sharalar, turǵyn úi qurylysy jáne injenerlik-kommýnikatsiialyq infraqurylymdy damytý.
Aimaq basshysy aǵymdaǵy jyldyń aqpan aiynda Qazaqstan Respýblikasy Qaýipsizdik Keńesiniń otyrysynda óńir turǵyndarynyń áleýmettik-ekonomikalyq jaǵdaiyn jaqsartý jáne damý qarqynyn arttyrý maqsatynda oblystyń ózekti máseleleri qaralǵanyn atap ótti.
"Qaýipsizdik Keńesiniń otyrysynda Keńes Tóraǵasy-Elbasy N.Á.Nazarbaev 2022 jylǵa deiin oblysty damytýdyń Keshendi josparyn ázirleýdi tapsyrǵan edi. Jospar quny - 219,7 mlrd.teńge. Onyń ishinde respýblikalyq biýdjetten 156,7 mlrd. teńge, jergilikti biýdjetten 50,6 mlrd. teńge jáne basqa kózderden 12,4 mlrd. teńge bolatyn 119 is - sharany iske asyrýdy qamtidy", - dedi aimaq basshysy.
QR Premer - ministri Asqar Mamin "Keshendi jospardy iske asyrý óńirdiń damýyna oń serpin beretinin" atap ótti.
Aita keteiik, óńirdiń damý jospary 2019 jylǵy 21 mamyrdaǵy respýblikalyq biýdjet komissiiasynyń otyrysynda maquldandy.
