Qyzylordadaǵy "Aqmeshit" gýmanitarlyq-tehnikalyq institýtynyń biylǵy túlekteri alǵan diplomy jaramsyz ekenin bildi, - dep habarlaidy Tengrinews.kz tilshisi.
Jastardyń aitýynsha, alǵan diplomdarynda sáikestendirý nómeri joq.
"Bes aidan beri jumysqa tura almai júrmiz. Tórt jyl 210 myń teńgeden tólep oqyǵan diplomymyz jaramsyz bolyp shyqty, endi qaida baramyz, ne isteimiz?", - dep jazady bir top jas Instagram jelisindegi kritikakyzylordy-paraqshasynda.
Túlekter litsenziia máselesi qashan sheshiletinin bilý úshin telefon soǵyp, ýniversitetke birneshe márte barǵanyn, ázirge jaýap joq ekenin aitady.
"Qansha túlekke biregei sáikestendirý nómiri joq diplom berildi. Al birinshi kýrs stýdentteri she? Institýt ókilderi sotta jeńip shyqqandaryn aitqan", - deidi qyzylordalyqtar.
Tilshimiz túsinikteme alý úshin QR Bilim jáne ǵylym ministrligine júgindi. Vedomstvonyń baspasóz qyzmeti ýniversitet áreketi zańsyz ekenin aitty.
"2021 jyldyń jazynda biz "Aqmeshit" gýmanitarlyq-tehnikalyq institýty bas litsenziiasynan aiyrylǵany týraly aqparat jariialadyq. Tiisti sheshimdi sot qabyldady. Ýniversitetke barlyq sáikessizdikti joiý úshin ýaqyt berildi. Alaida joǵary oqý orny ony bilim berý qyzmetteriniń sapasyn jaqsartý úshin qajetti jumys júrgizýdiń ornyna sot talqylaýyna jáne QR BǴM komitetiniń is-áreketterine shaǵymdanýǵa jumsady", - dedi QR Bilim jáne ǵylym ministrliginiń baspasóz hatshysy Móldir Ábdýalieva.
Sondai-aq, vedomstvo ókilderi litsenziiadan aiyrý týraly jáne JOO-da akkreditteý bolmaǵan jaǵdaida olar granttardy saqtai otyryp jáne igerilgen kreditter men pánderdi qaita esepke ala otyryp, basqa JOO-ǵa aýysýǵa quqyly ekeni týraly jurtshylyqty habardar etkenin málimdedi.
"Ata-ana men stýdentterdiń jariialanǵan aqparatqa nazar aýdarýy jáne joǵary oqý oryndaryn tańdaý men odan ary oqý máselesine jaýapkershilikpen qaraýy óte mańyzdy.
Joǵary oqý oryndaryn jabý kezinde ministrlik bilim berý qyzmetteri sapasyna qoiylatyn talaptardy basshylyqqa alady", - dedi vedomstvonyń baspasóz hatshysy Ábdýalieva.
Tilshi "Aqmeshit" gýmanitarlyq-tehnikalyq institýtynyń basshylyǵyna habarlasty. Rektor Erlan Shynbergenov institýttan litsenziia alyp, diplomdardyń jaramsyz ekeni týraly áńgimelerge senýdiń qajeti joq dep jaýap berdi.
"Bizde kóp bilikti muǵalimder men professorlar jumys isteidi. Eger bizde litsenziia bolmasa, olar qalai jumys istep júr? Resmi túrde, zań boiynsha jumys isteimiz! Diplomdarǵa keletin bolsaq, onda tek seriialyq nómirdi qoiý kerek. Biz diplomdardy 2021 jyldyń mamyrynda berdik, al diplomdardyń jeke úlgilerinde biregei sáikestendirý nómirleri bolýy kerek degen buiryq 2021 jyldyń 7 maýsymynda shyqty. Biz QR Bas prokýratýrasyna QR BǴM Bilim jáne ǵylym salasyndaǵy baqylaýdy qamtamasyz etý komitetiniń áreketine shaǵymdaný boiynsha ótinish berdik. Sheshim shyqqannan keiin barlyq 399 túlekke birden seriialyq nómirler qoiamyz jáne másele sheshiledi", - dedi ol.
