Oblysqa jumys sapary kezinde QR Bilim jáne ǵylym ministri Erlan Saǵadiev bilim salasynyń qyzmetkerlerimen, joǵarǵy oqý oryndarynyń ǵalymdarymen kezdesti, dep habarlady Ult.kz tilshisi QazAqparat agenttigine silteme jasap.
Jiynnyń alǵysózinde oblys ákiminiń orynbasary Rýslan Rústemov osy jyldyń ustazdar men oqýshylar úshin jańalyqqa toly bolǵanyn jetkizdi. Atap aitqanda, UBT-nyń jańa formaty engizilip jatyr, qorytyndy attestatsiialaý jańalandy, «Barshaǵa arnalǵan tegin kásiptik-tehnikalyq bilim» jobasy bastaldy. Saǵadiev sózinde Elbasy Joldaýynan týyndaityn máseleler men bilim júiesindegi ózgeristerge keńinen toqtaldy. Ministr úshtildilik, onyń ishinde memlekettik til jaiyna toqtaldy.
Onyń aitýynsha, biyl UBT-ny qazaqstandyq túlekterdiń 80 paiyzy, syrboiylyq bitirýshilerdiń 98 paiyzy qazaq tilinde tapsyrýǵa nietti. Ministrlik orys tilinde bilim beretin mektepterde qazaq tilin oqytýdyń ǵylymi negizdelgen, kommýnikativti ádiske súiengen deńgeili baǵdarlamasyn ázirledi. Bul ádisteme biyl jekelegen mektepterde pilottyq joba retinde qoldanysqa engiziledi. Qazaqstanda birinshi ret aýyzeki sóileýdi damytýǵa arnalǵan jiilik sózdik shyǵaryldy. Munda burynǵydai oqyp, mátin aýdarý degen bolmaidy.
Aǵylshyn tilin bilý - zaman talaby. Biyl aǵylshyn tilinde sabaq beretin 5 000 muǵalimdi 9 aiǵa deiin tereńdetilgen kýrstarda oqytý josparlanǵan bolatyn. Onyń ornyna fizika, himiia, IT jáne biologiia pánderinen sabaq beretin 12 000 adam jazylyp, qosymsha qarjylandyrý máselesi sheshildi. Kelesi jyly taǵy 12 000 muǵalim bilimin shyńdaidy. Pánderdi aǵylshyn tilinde oqý erikti túrde júredi, ol úshin ata-ananyń jazbasha ruqsaty kerek.
Saǵadiev osy jyly kóp suraqtyń jaýaby tabylatynyn, atap aitqanda, daiyndyq ýaqyty, oqytý sapasy, muǵalimder men balalardyń daiyndyǵy syndy máseleler sheshiletinin aitty. Óitkeni atalǵan jumystyń qorytyndysyna sai joǵarǵy synypta 4 pándi aǵylshyn tilinde oqytý kestesine kóshý 2018 jyldyń aiaǵynda aiaqtalady.
Kezdesýde ministr bilim salasy ókilderiniń suraqtaryna jaýap berdi. Al sapardyń ekinshi kúninde ministrdiń Aral, Qazaly, Qarmaqshy aýdandaryndaǵy apatty mektepterdiń ornyna jańadan salynǵan bilim oshaqtarynyń ashylý jáne sońǵy qońyraý saltanatyna qatysýy josparlanǵan.
