Memleket basshysynyń aimaqtarda sport infraqurylymyn damytý, onyń ishinde stadiondar men sport keshenderiniń sanyn kóbeitý tapsyrmasyna sáikes, Qyzylorda qalasynda jańa stadion salyndy. Bul týraly Ortalyq kommýnikatsiialar qyzmetinde ótken brifingte aimaq basshysy Nurlybek Nálibaev aitty.
«ÝEFA-nyń IV sanatty sertifikatyn alǵan 11 myń oryndyq zamanaýi nysanda aýqymdy sporttyq sharalardy ótkizýge barlyq múmkindik bar. Jańa stadion 4 qazan kúni fýtboldan Qazaqstan kýbogynyń finaldyq oiynymen ashyldy.
Aimaǵymyzda halyqtyń barlyq sanatynyń buqaralyq jáne kásibi sportpen shuǵyldanýyna jaǵdai jasalǵan. Sońǵy 3 jylda 21 sport kesheni boi kóterip, el igiligine tabystaldy.
Oblys ortalyǵyndaǵy iri jobalardyń biri – aýmaǵy 25 myń sharshy metr, quny 20 mlrd. 500 mln. teńge bolatyn kópbeiindi «Qyzylorda Arena» sport kesheni. Búginde keshenniń qurylys alańyndaǵy jumys qarqyndy.
«Samuryq Qazyna Trast» qorymen birlesip salynǵan «Tennis ortalyǵy», «Qazaqstan halqyna» qorynyń qoldaýymen Shieli, Jalaǵash aýdandarynda jańa sport keshenderi el igiligine tabystaldy. Qordyń demeýshiligimen taǵy bir dene shynyqtyrý-saýyqtyrý kesheni salynýda. Nysan jaqyn kúnderi paidalanýǵa beriledi», – dedi N.Nálibaev.
Aita keteiik, jergilikti kásipkerlerdiń demeýshiligimen ornatylǵan 80 sport-oiyn alańy el igiligine ainaldy. «Aýyl – el besigi» baǵdarlamasymen 5 sport kesheni boi kóterip keledi.
Búginde oblysta 1538 sport ǵimaraty bar, salany qarqyndy damytýǵa ulttyq kompaniialar, qorlar jáne jergilikti kásipkerler de belsendi atsalysýda.
Sonyń biri – «Samruk Kazyna Trust» áleýmettik jobalardy qoldaý qorymen birlesken, Qyzylorda qalasynyń sol jaǵalaýyna 3 mlrd. 400 mln teńgege salynǵan «Tennis ortalyǵy».
«Qazaqstan halqyna» qoǵamdyq qorynyń demeýshiligimen 2 mlrd. 900 mln teńgege erekshe qajettiligi bar jandarǵa arnalǵan dene shynyqtyrý-saýyqtyrý kesheni salynýda. Atalǵan qordyń kómegimen osy jyly Shieli jáne Jalaǵash aýdandarynda jańa sport keshenderi salynyp, aýyl turǵyndaryna tabystaldy.
Qazaqstan fýtbol federatsiiasynyń «Alań» baǵdarlamasymen 2024 jyly Qyzylorda qalasyndaǵy Ǵani Muratbaev atyndaǵy ortalyq stadionnyń qosalqy alańy qaita jańǵyrtýdan ótken bolatyn. Osy jyly da federatsiia qoldaýymen Jalaǵash aýdanynyń ortalyq stadiony kúrdeli jóndeýden ótip, aýdan jurtshylyǵy men sportshylaryna paidalanýǵa berildi.
Biylǵy jyldyń taǵy bir jańalyǵy – oblys ákiminiń qoldaýymen jeke teńgerimdegi «Tarlan» sport kesheni basqarma menshigine berilip, «Qyzylorda erler jáne áielder boks klýby» bolyp resmi túrde ashyldy. Ǵimarat demeýshiler esebinen kúrdeli jóndeýden ótip, zaman talabyna sai tolyq jańǵyrtyldy.
Osylaisha halyqtyń sporttyq infraqurylymmen qamtylý kórsetkishi 56,5 paiyzǵa jetti.
