Balyq sharýashylyǵy komiteti Qyzylorda oblysy Aral aýdany Bógen aýyldyq okrýgine qarasty Qarashalań sý aidynyna Syrdariia ózeninen sý alatyn kanaldyń (Saǵynbai kanaly, jergilikti halyq Kógish dep ataidy) boiynda balyq shabaqtarynyń qyrylýy faktisin tekserdi, dep habarlaidy QazAqparat.
Eske sala keteiik, biz buǵan deiin Qyzylorda oblysynda balyq qyrylǵanyn habarlaǵan bolatynbyz.
«Balyq shabaqtarynyń jappai qyrylýyna bailanysty 19 aqpan kúni osyǵan deiin bekitilgen 2021-2023 jyldar aralyǵyndaǵy qys mezgilinde balyq sharýashylyǵy sý aidyndarynda jáne (nemese) ýchaskelerinde balyqtardyń jappai qyrylý qaterine jol bermeý jónindegi is-sharalar josparyna sáikes, quzyrly organdarmen birge zerdeleý jumysyn júrgizdi. Jalpy kólemi boiynsha kanal uzyndyǵy - 1,2 km jýyq, eni - 16 m. Zertteý barysynda kanal boiynan birneshe oiyq oiylyp, balyq qyrylǵany (torta, taban, aqbalyq) anyqtaldy. Kanal boiyndaǵy qyrylǵan balyq shabaqtarynyń jalpy salmaǵy 975,2 kg, eń kishi uzyndyǵy -4,5 sm, eń úlkeni-10 sm. Zertteý júrgizý kúni sýdaǵy ottegi mólsheri 3,5 mg/dm³, temperatýrasy 2,5 ºS, ortasha tereńdigi 2,5 m quraǵan. Ǵylymi uiymnyń mamany óziniń aldyn ala tujyrymdamasynda otteginiń azdyǵy balyqtar tirshiligi úshin qolaisyz ekendigin bildirgen» dep málim etti komitetten.
Sonymen qatar, Bógen aýyldyq okrýginiń veterinariia pýnktiniń qyzmetkerleri balyqtyń jáne Qyzylorda oblysy boiynsha ekologiia departamentiniń qyzmetkerleri sý synamasyn alyp, saraptama júrgizip jatyr.
Onyń nátijesi qosymsha jariialanady.
Qazirgi tańda balyqtardyń tirshilik etý jaǵdaiyn jáne balyq resýrstaryn saqtap qalý maqsatynda jergilikti artqarýshy organdarmen oiyq jasaý (ottegi berý úshin) jumysy júrgizilip jatqanyn aita ketý qajet.
