Qyzylorda oblysynda jańa oqý jylynda 8 oqýshy koronaviýs infektsiiasyn juqtyrdy, dep habarlaidy "Ult aqparat".
Búgingi kúnge deiin oblysta koronavirýs infektsiiasyn juqtyrǵan 3289 adam tirkeýge alynǵan. Onyń ishinde 14 jasqa deiingi balalar - 192, 15-19 jas aralyǵyndaǵy jasóspirimder -55 adam.
Jańa oqý jylynda oblysta 8 oqýshy koronaviýs infektsiiasyn juqtyrdy. Onyń bireýi densaýlyq jaǵdaiyna bailanysty úiden oqityn, 2005 jyly dúniege kelgen Qarmaqshy aýdanynyń turǵyny bolsa, qalǵany qashyqtan bilim alady. Mektepte qaterli indetti juqtyrý deregi tirkelgen joq.
«Oblystyń Bas memlekettik sanitariialyq dárigeriniń 11 qarashadaǵy №26 qaýlysyna sáikes 2020-2021 oqý jylynyń ekinshi toqsanynan bastap kontingenti 300 oqýshyǵa deiingi qalalyq jáne aýyldyq mektepterde, synyptaǵy balalar sanyn 15 adamnan asyrmai dástúrli formatta oqytýǵa ruqsat berilgen.
Sondai-aq, ata-analar ótinishi boiynsha synyptaǵy oqýshy sanyn 15 baladan asyrmai, jalpy bilim beretin mektepterde 1 synyptan 5 synyp boiynsha oqytýǵa bolady. Al halyqaralyq mektepterde 7 synypqa deiin kezekshi synyptarda oqytýǵa ruqsat berildi», - dedi Qyzylorda oblysy sanitarlyq-epidemiologiialyq baqylaý departamenti.
Vedomstvo málimetinshe, qaýlyǵa sáikes oblysta dástúrli formatta oqytýǵa qosymsha 47 mektep kóshken. Biylǵy oqý jylynyń ekinshi toqsanynda oblys boiynsha 121 mektepte 19 314 oqýshy dástúrli formatta bilim alsa, 179 mektepte 117 190 oqýshy qashyqtan oqytylýda.
