Foto: Tengrinews.kz
Qyzylordada qala mektepteriniń biriniń 11-synyp oqýshysy parallel synyp oqýshysyn pyshaqtap tastady. Jábirlenýshi aýrýhanaǵa jatqyzyldy. Meditsinalyq kómek kórsetilgennen keiin oǵan úiine qaitýǵa ruqsat etildi, - dep habarlaidy Tengrinews.kz.
Oqiǵa 4 sáýirde bolǵan. Oblystyq Politsiia departamentiniń baspasóz qyzmeti málimetinshe, oqýshylar arasynda janjal shyǵyp, saldarynan kámeletke tolmaǵandardyń biri ekinshisin pyshaqtap ketken.
"Bul derek QR Qylmystyq kodeksiniń 293-baby boiynsha tirkelip, tiisti saraptamalar taǵaiyndaldy. Kúdikti jasóspirim Qyzylorda qalalyq politsiia bólimine jetkizilip, ata-anasyna tapsyryldy. Tergeý amaldary júrgizilip jatyr", - dedi PD baspasóz qyzmeti ókilderi.
Oblystyq kópsalaly balalar aýrýhanasy málimetinshe, oqýshy barlyq qajetti tekserýlerden ótken.
"Ol iyq, keýde jáne jambas tusynan pyshaq jaraqatyn alǵan. Jaralary qaralyp, sodan keiin ambýlatorlyq emdeýge jiberildi", - dedi aýrýhana dárigeri.
Bul oqiǵaǵa qalalyq bilim bólimi de pikir bildirdi.
"Aiqyn pyshaq jaraqaty bolmaǵanyn aita ketý kerek, óitkeni metall zatpen jeńil jaraqattar alǵan. Osyǵan bailanysty qalalyq bilim bóliminen jumys toby quryldy. Qazir komissiia jumys istep jatyr. Bul iske kináliler tártiptik jazaǵa tartylady", - dedi qalalyq bilim bóliminiń bas mamany Samat Kúnhojaev.
