Biyldan bastap quqyq qorǵaý organdaryna alǵash ret jumysqa alynatyn azamattar úshin irikteý protsedýrasy ákimshilik memlekettik qyzmet standarttaryna jaqyndatylady. Iaǵni, budan bylai quqyq qorǵaý organdaryndaǵy qyzmetten úmitkerler zańnamalyq bilim deńgeiin anyqtaýǵa arnalǵan testileýden, jeke qasietterin baǵalaýdan jáne áńgimelesýden ótetin bolady.
Osy úsh satynyń bastapqy eki kezeńi Memlekettik qyzmet isteri jáne sybailas jemqorlyqqa qarsy is-qimyl agenttiginde uiymdastyrylsa, sońǵy satysy múddeli memlekettik mekemede jalǵasady. Mundai derekter agenttik keńsesinde ótken baspasóz máslihatynda málimdeldi. Aita keteiik, zaman talabyna sai jetildirilip jatqan memlekettik qyzmetke ornalasýdyń jańasha ádisi «100 naqty qadam» Ult josparynyń aiasynda júzege asyrylýda.
Endeshe, memlekettik qyzmet sanatyna jatatyn quqyq qorǵaý organdaryna maman tańdaý isine tyńnan qosylǵan tásilderdi túsindirip kórelik. Mundai jańa júie azamattyń qyr-syryn tanyp, bilýde qandai múmkindikter beredi? Osy sekildi san saýalǵa jaýap berýde basa aitqymyz keletini – jańartylǵan joba eń aldymen úmitkerdiń zańnamalyq bilim deńgeiin anyqtaýǵa baǵyttalǵandyǵy.
Sondai-aq, jeke qasietterin baǵalaý ádisi úmitkerlerdiń jaqsy jaqtary men kemshin tustaryn, qabilet-qarymyn anyqtaýǵa negizdelgen. Sonyń ishinde, azamattardyń qajettilik múddeleri men keibir qasietterinen habardar bolýyn, adamdarmen jumys isteý múmkindigin, uiymdastyrýshylyq sheberligin, ádeptiligi men sybailas jemqorlyqqa tózbeýshiligin anyqtaýǵa septigin tigizedi. Al sońǵy áńgimelesý kezeńinde kandidattyń qajetti quzyretteri men daǵdylaryn, taldaý qabiletin, óziniń oi-pikirin bildire alý múmkindikteri aiqyndalady. Bul rette úmitkerge beiimdik, ýájdemelik suraqtar, quzyreti boiynsha sáikes saýaldar qoiylyp, kommýnikatsiialyq qasietterin baiqaý úshin ahýaldyq esepterdi sheshý usynylady.
Memlekettik jáne quqyq qorǵaý qyzmetine irikteý basqarmasynyń jetekshisi Erkebulan Berdibekov testileý protsedýralarynyń ashyqtyǵy men aiqyndyǵyn qamtamasyz etý máselesine qatysty bylai dedi: «Agenttiktiń testileý zaldary mobildi bailanysty báseńdetý quraldarymen jáne úmitkerdi aiqyndaý maqsatynda arnaiy kardriderlermen jabdyqtalatyn bolady. Sondai-aq, árbir jumys orny úmitkerdi fotoǵa túsire otyryp, testileý úderisiniń beinejazbasyn júrgizý úshin veb-kameralarmen qamtylady. Máselen, siz testileý protsedýrasyn baqylaýǵa niet bildirseńiz, ony Astana qalasyndaǵy agenttiktiń arnaiy kabinetine ornatylǵan ekran arqyly kóre alasyz. Jalpy, elimiz boiynsha jyl saiyn testileýden 37 myńnan astam azamat ótetindigin eskersek, aldaǵy ýaqytta jańa júie óz tiimdiligin kórsetedi degen senimdemiz».
Mamandardyń aitýynsha, úmitker testileýden sátti ótken jaǵdaida oǵan arnaiy sertifikat, al jeke qasietterin baǵalaý boiynsha arnaiy qorytyndy beriledi. Bul qujattardyń jaramdylyq merzimi 12 aidy quraidy jáne sóz basynda aityp ótkenimizdei, kez kelgen quqyq qorǵaý organdarynyń baiqaýyna testileýsiz qatysýǵa quqyq beredi.
Nurlybek DOSYBAI,
«Egemen Qazaqstan»
.jpeg)