Almaty oblysy Kóksý aýdanynyń politseileri qyzmettik mindetterin oryndaý barysynda baqilyq bolǵan áriptesterine arnap eskertkish ornatty. Bul týraly Almaty oblysy politsiia departamentiniń baspasóz qyzmeti habarlady.
Saltanatty sharaǵa qaza bolǵan qyzmetkerlerdiń jaqyndary, oblystyq politsiia departamentiniń bastyǵy Murat Urumhanov, aýdan basshylyǵy, aýdandyq politsiianyń jeke quramy jáne jergilikti turǵyndar qatysty.
«Almaty oblysynda 30-dan astam qyzmetker qyzmet atqarý kezinde qaza bolǵan. Biz olardyń erlik isteri men jarqyn beinesin eshqashan umytpaimyz. Olardyń artynda qalǵan otbasyna qolymyzdan kelgenshe qoldaý kórsetýdemiz. Búgingi ashylǵan eskertkish olardyń alasarmas aibyny men el tynyshtyǵy jolynda qurban bolǵan ǵumyrynyń máńgilik belgisi bolmaq. Biz olardy qashanda qurmet tutamyz», - dedi politsiia general-maiory Murat Urumhanov.
Kóksý aýdanynda eki qyzmetker mindet atqarý kezinde qapiiada qaza tapqan. Onyń biri – Em Georgii Chan-Sikovich 1993 jyly qandyqol qylmyskerdiń qolynan qaza bolsa, ekinshi qyzmetker Aidyn Baisalbaev 2004 jyly kúdiktilerdi politsiia bólimine ákele jatqanda jol-kólik oqiǵasynda baqilyq bolǵan.
Is-shara barysynda qatysýshylar eskertkishke gúl shoqtaryn qoiyp, qaza tapqan áriptesterin eske aldy. Tártip saqshylary dástúr boiynsha aspanǵa myltyqtan oq atyp, qaza tapqan áriptesteriniń aibyndy beinesine qurmet kórsetti.
Sonymen qatar, Kóksý aýdanynyń politseileri is-sharaǵa qatysýshylardy qyzmetkerlerge arnalǵan tir, dene shynyqtyrýǵa arnalǵan zal jáne turǵyndarǵa sapaly qyzmet etý úshin ashylǵan jańa front-keńseni tamashalaýǵa shaqyrdy.
