Atyraýda qyzdy qutqaram dep sýǵa ketken Shalqar Aqymǵaliev memlekettik nagradaǵa usynylady. Bul jaiynda QR Ishki ister ministriniń keńesshisi-resmi ókil Nurdildá Oraz aitty, dep habarlaidy QazAqparat tilshisi.
«Ishki ister ministri Erlan Turǵymbaev politsiia qyzmetkeri Aqymǵaliev Shalqar Kókinbaevtyń otbasyna qaiǵylaryna ortaqtasyp, kóńil aitty. Atyraýda qyzdy qutqaram dep sýǵa batyp ketken patrýldik politsiia serjanty Shalqar Aqymǵaliev memlekettik nagradaǵa usynylady. Sh.Aqymǵalievtiń otbasyna IIM jeke quramy tarapynan materialdyq kómek kórsetiletin bolady», - dedi Nurdildá Oraz.
QR IIM Erlan Turǵymbaev Shalqardyń anasy Lázzat Májenqyzyna joldaǵan kóńil aitý hatynda ishki ister organdary jáne qalyń qazaq jurty óziniń er-júrek, batyr ulynynan kóz jazyp qalǵandyǵyn, bul orny tolmas qaiǵy ekendigin basa atap ótken.
«Qazaqtyń dańqty batyry Baýyrjan Momyshulynyń «Adam bolý - qasiet, azamat bolý - mindet, patriot bolý - paryz» degen qanatty sózi bar. Sizder tárbielep ósirgen uldaryńyz Shalqar Kóshkinbaiuly osy qasietterge laiyq edi. Adam retinde qalyptasty, azamat bolyp atqa qondy, patriottyq bolmysymen el tynyshtyǵyn qorǵady. Ol árbir qazaqstandyqtyń ómirin saqtaýdy óziniń qasietti boryshy sanady. Sondyqtan syn saǵattarda naǵyz batyrlarǵa tán erlikke baryp, ózgeniń ómiri úshin óz janyn qurban etti», - dep jazdy ol.
Ministr hatynda Shalqar Kóshkinbaiuly ishki ister salasynda bes jyl qyzmet atqarǵanyn, ony áriptesteri qyzmetine adal, dostyqqa berik, júregi úlken azamat retinde biletindigine basa nazar aýdarǵan.
«Elin sheksiz súigen, halqy úshin adal qyzmet atqaryp, týǵan jer tynyshtyǵyn qas qaqpai qorǵaǵan batyr ul ósirgenderińiz úshin aldaryńyzda basymyzdy iemiz. Biz onyń eren erligin, batyrlyq bolmysyn, biik azamattyq kelbetin eshqashan umytpaimyz. Asyl erdiń jany jánnatta, topyraǵy torqa, imany joldas bolsyn!», - dedi E.Turǵymbaev.
Buǵan deiin Atyraýda politsiia sýǵa batqan áieldi qutqaram dep mert bolǵanyn habarlaǵan edik.
