Qazaq ulttyq qyzdar pedagogikalyq ýniversitetinde Abaitaný kýrsy engizildi. Búginde oqý ornynyń stýdentterine abaitanýdyń bastaýlary, aqynnyń ómiri men shyǵarmashylyq joly oqytylýda, – dep habarlady ýniversitettiń baspasóz qyzmeti.
Buǵan deiin Qyzdar ýniversitetiniń Qazaq filologiiasy jáne álem tilderi fakýltetiniń stýdentterine Záki Ahmetov, Tursynbek Kákishov, Mekemtas Myrzahmetuly syndy ǵalymdar abaitaný kýrsyn júrgizgen bolatyn. Al byltyrǵy oqý jylynan bastap ol barlyq fakýltetterde oqytyla bastady. Bolashaq pedagogtar kýrs barysynda abaitaný máseleleriniń damý baǵyttarymen, onyń aqyndyq mektebimen jáne hakimniń «Tolyq adam» filosofiiasymen tanysady.
Osy oraida Qyzdar ýniversitetiniń professory, filologiia ǵylymdarynyń doktory Rýda Zaikenovanyń «Abaitaný» atty oqýlyǵy da jaryq kórdi. Kitapta aqynnyń shyǵys, batys jáne orys ádebietterimen bailanysy, ǵulama oishyldyń ǵylym, bilim, óner, el bileý, tarih, mahabbat, dini tanym taqyrybynda jáne synshyldyq kózqarasta jazylǵan filosofiialyq qarasózderiniń, óleńderiniń, poemalarynyń, aýdarmalarynyń mán-maǵynasy men mańyzy keńinen túsindirilgen.
«Shynaiy talant – ilýde bireýdiń ǵana mańdaiyna jazylatyn táńirdiń syiy. Osy turǵydan alyp qaraǵanda, XIX ǵasyrdyń ekinshi jartysynda kiiz týyrlyqty shańyraq astynan qarap-aq, álemdik deńgeide sheberlik naqysh týǵyzyp, óreli oi aitqan qazaq halqynyń uly aqyny, hakim Abai danalyǵyna jańa zaman biiginen qarap, kóńil aýdarýdyń mańyzy zor. Abai – ǵalamdyq tulǵa. Abaitanýdyń bastaý XX ǵasyrdyń bas kezindegi Alash arystary men sol tusta ómir súrgen oqymystylardyń tanym-biliginen bastalady. Qunanbaiulynyń danalyǵyn jete meńgerý arqyly búkilálemdik gýmanistik jáne ulttyq ólshemderdiń adam tulǵasyn qalyptastyrýdaǵy ornyn baǵamdap, ómirdi jáne adamzat qupiiasyn tanýǵa bolady», – deidi oqýlyq avtory, professor Rýda Zaikenova.
