QR Mádeniet jáne sport ministrliginiń qoldaýymen «Qazaqkontsert» memlekettik kontserttik uiymy jeltoqsan 3-shi juldyzynda Eýropa memleketteriniń astanalarynda ótkizýdi josparlaǵan úlken gastroldik týrneniń shamyldyǵyn ashty.
«Qazaqkontsert» memlekettik kontserttik uiymynyń «Astana Musical» teatry «Uly Dala teatry» ataýymen "Qyz Jibek" etno-folklorlyq miýziklin Frantsiia memleketiniń Parij qalasynyń "Le Trianon" teatrynyń sahnasynda eýropa jurtshylyǵynyń nazaryna usyndy. Qoiýshy-rejisseri jáne joba avtory – «Astana Musical» teatrynyń kórkemdik jetekshisi, «Qazaqkontsert» MKU direktory, Qazaqstannyń eńbek sińirgen qairatkeri Ashat Maemirov. Sonymen qatar, qoiylym barysynda «Astana sazy» etno-folklorlyq ansambli óner kórsetti. Atalmysh miýziklge Qazaqstannyń Frantsiiadaǵy elshisi Jan Serjanuly Ǵaliev arnaiy kelip tamashalap, jas teatrdyń ónerine baǵasyn berip, gúl shoǵyn tabystady.
Ǵasyrlar qoinaýynan syr shertetin «Qyz Jibek» týyndysy – qazaqtyń liro-epostyq jyrynyń jaýhary. Tragediia keiipkerleri – Jibek pen Tólegen álemge áigili Romeo men Djýletta siiaqty qazaq halqy úshin mahabbattyń simvoly ispettes. Oqiǵalar negizinen jas batyr Tólegen, Qyz Jibek jáne el arasynda erjúrektigimen, kúsh-qairatymen aty shyqqan batyr Bekejan arasyndaǵy qarym-qatynastar tóńireginde órbidi de, aqyry Tólegen qyzǵanyshtyń qurbany bolady. Súigeninsiz Jibekke de ómir joq. El birligi men tutastyǵy ideiasy qatar órilip, halyqtyń oi-armany men ańsary tanylatyn, boiaýy jarqyn qoiylymda ulttyń ómiri men tyǵyz bailanysty dástúrler de, bata sóz, qarǵys, joqtaý, zar, kóńil aitý, qoshtasý jáne t.b. jaqsy kórinis tapqan. Jibek beinesi - sulýlyq pen ásemdiktiń nyshany, qazaq halqynyń maqtanyshy, rýhani eskertkish. Dala teatrynyń negizinde sahnalanǵan «Uly dala teatry» etnofolklorlyq miýziklinen kórermen qazaq halqynyń ulttyq tanymymen etene tanysýǵa múmkindik alady. Sondai-aq, spektaklde qos aqynnyń sóz tartysy, oi qaqtyǵysymen qatar sýyrypsalmalyq qabiletin dáripteitin qazaqtyń ulttyq óneri aqyndar aitysy oryn alǵan.
Qazaq halqynyń ulttyq qundylyqtaryn nasihattaityn miýzikl kópshiliktiń kóńilinen shyǵyp, teatr mamandary men ónersúier kórermenniń joǵary baǵasyna ie boldy. "Qazaq halqynyń óte bai ulttyq mádenietine kýá bolyp, qazaq eline sapar shegip qaitqandai áser ettik. Ártúrli aspaptarda oryndalǵan áserli áýender men tabiǵi daýysta shyrqalǵan ánder júrek tebirentti deidi - Sarbon ýniversitetiniń professory, belgili teatrtanýshy Mari Kristin Sirijol. Al Rejisser, teatr synshysy David Chhavlis "Basty keiipkerlerdi somdaǵan artisterdiń kásibi akterlik sheberlikteri men vokaldyq múmkindikteri tánti etti. Osyndai keremet miýzikldi sahnalaǵan rejisserge shyǵarmashylyq tabystar men sáttilik tileimiz" - dep joǵary baǵa berdi. Teatrtanýshy Lasha Chhartishvili: "Men "Astana Miýzikl" teatrynyń bolashaǵy zor dep oilaimyn. Sebebi olarda úlken potentsiial bar. Ártúrli baǵytta óner kórsetetin múmkindigi mol ekenin ańǵardyq. Bul spektakl Astana teatrlarynyń deńgeiin, ásirese jas ujymnyń qarym qabyletiniń óskendigin kórsetedi" deidi. Ailar boiy úlken daiyndyq pen tolassyz eńbekti talap etken qoiylym anshlagpen ótken eki saǵat pen Eýropa jurtshylyǵynyń qoshemet kórsetken sátimen este qaldy.
Gastroldik týrne kelesi kezekte Kann qalasynyń "Theatre Croisette" teatrynda óziniń jalǵasyn tabady.
