Qytaidyń ár qalasynan jinalǵan jankúierler Dimashtyń búgingi kontsertine neon shamdarymen Dimashtyń esimi jazylǵan 6 metrlik banner alyp keldi.
Ózderin «Dimashtyń qanaty» dep tanystyrǵan jankúierler tobynyń 50-ge tarta múshesi Astanaǵa 25 maýsym kúni Beijiń qalasynan jinalyp, «Eir Astana» áýe kompaniiasynyń Beijiń-Astana baǵytyndaǵy aviareisi arqyly jetken. Toptyń jetekshisiniń aitýynsha, top músheleriniń qoldaýymen olar kontsertke quny 60 myń teńge turatyn Dimashtyń esimi jazylǵan 6 metrlik jáne kishkentai bannerler jasatyp alyp kelgen. Budan syrt, Qytailyq jankúierler atynan saýǵa retinde qazaqtyń dombyrasy beinelengen kiltke taqqyshtar jáne arnaiy jasalǵan «Bastaý» shyǵarmashylyq keshiniń tósbelgisin ala kelgen.
«Men qytaidyń Hýnan provintsiiasy Chansha qalasynan keldim. Chansha Dimashtyń armanynyń bastalǵan jeri. Búgin Dimashtyń týǵan jerinde bolyp, onyń shyǵarmashylyq keshin kórý men úshin úlken qýanysh», - dedi top jetekshisi Han Iýýaniýýan.
Aita keteiik, «Bastaý» kontserti EKSPO-2017 halyqaralyq kórmesi aiasynda 27 maýsym kúni elordadaǵy «Astana Arena» stadionynda ótedi. Dimash Qudaibergen kontsertke qatysatyn ánshilerdi kópshilikke jariialaǵan bolatyn. Olar - Qytaidyń belgili ánshisi Terri Lin, Evrobaiqaý-2012 baiqaýynyń jeńimpazy Lorin (Shvetsiia), Ulybritaniia ánshisi Sofi Elis Bekstor, Kristina Orbakaite (Resei) jáne Qazaqstannyń eńbek sińirgen ártisi, opera ánshisi Maira Muhamedqyzy.
