Qytailyq týristik kompaniialar Qazaqstanda ótetin «EKSPO-2017» halyqaralyq kórmesine týristerdi tartýdyń amalyn taýyp otyr, deidi QazAqparat tilshisine pikir bildirgen QR Investitsiialar jáne damý ministrligi Týrizm indýstriiasy departamentiniń direktory Marat Iǵali.
Marat Iǵalidiń aitýynsha, búgingi tańda qytailyq týristik kompaniialar saittarynda Qytaidaǵy «Singer» jobasyna qatysqan ánshi Dimash Qudaibergenniń fotolaryn jariialaǵan. Osylaisha, olar EKSPO-ǵa týrister tartpaq.
«Kytailyq týrfirmalar Dimashtyń fotolary men týrtoptamalardy satyp jatyr. Dimashtyń jetistigi Qazaqstan immidjine paida berdi, bul úlgili is. Iá, shyndyǵynda, Dimash Qazaqstan týrizminiń ózindik beinesine ainalyp úlgerdi. Qytailardyń toptalyp kelgeni jaqsy, olar bizge aqsha ákeledi. Barlyǵy Dimashtyń EKSPO-da óner kórsetýin kútedi. Qytaida onyń tanymaldylyǵy artyp, shoýdaǵy kezeń saiyn áleýmettik jelisinde tirkelýshiler sany artyp barady. Qytailyqtar úshin jai ǵana Qazaqstanǵa barý emes, Dimash turatyn elge barý qyzyq bolyp tur», - dedi ol.
Buǵan deiin habarlanǵandai, Dimash Qudaibergen «Singer» baiqaýynyń 6-týrynda jeńimpaz atandy. Ol Lara Fabiannyń «Adagio» ánin oryndady.
