Qytailyq tanymal TikTok video qosymshasy ulttyq qaýipsizdik máselesine bailanysty qosymshaǵa tyiym salmaq bolǵan AQSh úkimetin sotqa berdi. Shaǵym 24 tamyzda Kaliforniia sotyna kelip tústi. Onyń avtorlary kompaniia amerikalyq qoldanýshylardyń qaýipsizdigi men jeke derekterine qatysty máselelerdi joiýǵa kúsh salǵanmen AQSh úkimeti ony elemei otyr dep shaǵymdanǵan.
Qytailyq TikTok jelisi AQSh-ta ulttyq qaýipsizdik máselesine bailanysty kúdikke ilingen, sebebi áleýmettik jeli qoldanýshylardyń jeke aqparatyn jinap, Qytai úkimeti talap etken jaǵdaida Pekinge tapsyrýǵa zańmen mindettelgen. Degenmen buǵan deiin kompaniia iesi "qoldanýshylar deregi Pekinge beriledi" degen aiyptaýdy joqqa shyǵarǵan.
Prezident Donald Tramp tamyz aiynyń basynda video qosymshanyń Qytai kommýnistik partiiasynyń qaralaityn kampaniiasyna qural retinde qoldanylýy múmkin ekenin aityp, qytailyq TikTok-pen kez kelgen kelisim jasaýǵa ýaqytsha tyiym salǵan edi. TikTok iesi ByteDance kompaniiasyna qosymshany satý týraly keńes berilgen. Aqparat boiynsha, sot protsesteri kompaniiany satý tártibine áser etpeýi tiis. Osyǵan deiin amerikalyq Oracle jáne Microsoft kompaniialary TikTok-ty satyp alýǵa yntaly ekenin bildirgen.
TikTok ókilderi shaǵymda Tramp ákimshiligi Halyqaralyq tótenshe ekonomikalyq ókilet aktisi (International Emergency Economic Powers Act) sharttaryn durys oryndamai otyr dep kórsetken. Kompaniia ókilderi "bul qatardaǵy jái qoqan-loqy emes" dep jazǵan.
Respýblikashyldar men demokrattar TikTok tóńiregindegi máselege alańdady.
TikTok Pekindegi ByteDance kompaniiasyna tiesili. Túrli effektilermen árlengen 15-60 sekýndtyq shaǵyn videony bólisýge arnalǵan TikTok áleýmettik jelisi alǵash 2016 jyly Douyin degen ataýmen Qytaida taralǵan. Keiinnen syrtqy naryqqa shyqty. 2018 jyly Muscial.ly kompaniiasymen qosylǵan soń álemde jyldam tarala bastady. Qazir onyń 1,5 milliardqa jýyq qoldanýshysy bar. Internet qoldanýshysy jelige tirkelerde jeke basynyń málimetin engizýi kerek.
2019 jyly kúzde TikTok jelisi Qytaidaǵy musylmandardy qýǵyndaý jaily videony joiǵanyna keshirim suraǵan. Rolikte 17 jastaǵy bloger Feroza Áziz kirpik uzartý jaiynda aita kele, Qytaidaǵy musylmandardyń jaǵdaiyna oiysady, ony Holokostpen teńestirgen. Videorolik joiylmai turǵanda eki millionnan astam ret kórilgen.
