Qytailyq kásipkerler Ońtústik Qazaqstan oblysy Otyrar aýdanynda 200 MVt-tyq energiia óndiretin kún elektr stansasynyń qurylysyn bastamaq. Bul týraly qytailyq «Tsindao Beihai» kompaniiasynyń arnaiy ókili Ming Ie óńir basshysy Janseiit Túimebaevpen kezdesýinde málim etti, dep habarlaidy "Ult aqparat".
Kezdesý barysynda jergilikti bilik atalǵan jobany júzege asyrýǵa qajetti 300 gektar jer telimin bólip, barlyq infraqurylymdyq qajettiliktermen qamtamasyz etip beretin bolyp kelisildi. Sondai-aq ekijaqty kelisimge sáikes, stansany «Kúnnury» dep ataý uiǵaryldy.
«Sońǵy jyldary álemde energetikalyq qaýipsizdik máselesi birinshi orynǵa shyqty. Osyny eskere otyryp biz ońtústik óńirinen kún elektr stasasyn salýdy jón kórip otyrmyz. Óitkeni bul óńirde kún erekshe ystyq ári bultty kúnder óte az bolady. Jobaǵa jumsalatyn shyǵyndarymyz ótelip bolǵannan soń stansany ózderińizge qaitaratyn bolamyz», - dedi Ming Ie myrza.
Qonaqtardyń usynystaryna qoldaý bildirgen óńir basshysy aimaqtaǵy elektr energiiasyna degen suranystyń jyl sanap artyp otyrǵanyna toqtaldy.
«Búginde Astana qalasynda ótip jatqan EKSPO-2017 kórmesiniń negizgi taqyryby - «jasyl» ekonomika. Iaǵni bolashaqtyń energiiasyn izdeý jáne balamaly qýat kózderin tabý ári paidalaný bolyp otyr. Osyǵan orai sizderdiń usynystaryńyzdy tolyq qoldaimyn. Qajetti jer telimi bólinip, infraqurylymdyq qajettiliktermen qamtamasyz etip beretin bolamyz. Ońtústik Qazaqstan oblysynyń shamamen 300 kúni bultsyz bolady. Bul jobany júzege asyrýǵa óte tiimdi», - dedi Janseiit Qanseiituly.
Búginde oblystyń ekonomikalyq damý qarqyny joǵary, aimaqta óndiris oryndary kóptep ashylyp, innovatsiialyq baǵdarlamalar júzege asyrylýda. Osynyń barlyǵy elektr energiiasyna degen suranysty arttyratyny sózsiz. Energetikalyq qaýipsizdik eń aldymen energetikalyq táýelsizdikke bailanysty ekenin eskersek, ońtústik óńirinde balamaly energetika nysandaryn salý asa mańyzdy bolyp otyr.
Kezdesý qorytyndysyna sáikes, Ońtústik Qazaqstan oblysy ákiminiń orynbasary Baýyrjan Jamalov pen qytailyq «Tsindao Beihai» kompaniiasy ókili Ming Ie investitsiialyq jobany iske asyrý jóninde memorandýmǵa qol qoidy.
