Foto: stock.adobe.com
Keiingi jyldary qazaqstandyqtar arasynda Qytai saittarynan túrli zattarǵa onlain tapsyrys berý jiiledi. Sebebi jetkizý qyzmeti jyldamdatylǵan jáne onlain taýardyń san-alýan túrin tabýǵa bolady. Munyń áserinen eldiń ishki naryǵyndaǵy kei kásipkerler saýdasy júrmei qalyp jatqanyn aitady. Sarapshylar Qytai marketpleisi Qazaqstan naryǵyndaǵy óktemdigin jalǵastyra berse, eldegi shaǵyn jáne orta kásipkerlerdiń kóbi jabylyp qalýy da múmkin deidi.
Qazaqstandyqtar arasynda ásirese Pinduoduo.com, 1688, AliExpress, Alibaba.com, Taobao, Dhgate siiaqty iri marketpleister asa tanymal. Kóp jaǵdaida tapsyrys beriletin zattar qataryna kiim-keshekten bastap, turmystyq tehnikalar, aksessýarlar, bólshek zattar jatady.
Pinduoduo.com saity 2015 jyly negizi qalanǵan elektrondy kommertsiialyq platforma. Aqparat kózderi bul elektrondyq kommertsiia kirisi biyl 12 milliard AQSh dollaryna jetkenin habarlady. Ótken jylmen salystyrǵanda 131 paiyzǵa ósken. Pinduoduo muny óziniń onlain marketingtik qyzmetteriniń kómegimen artqan suranyspen bailanystyrdy.
2024 jyldyń birinshi toqsanyndaǵy operatsiialyq kiris 3,6 milliard AQSh dollaryn qurady, bul 2023 jyldyń birinshi toqsanymen salystyrǵanda 275 paiyzǵa ósken. Pinduoduo kompaniiasynyń Qazaqstan naryǵynda qansha paida tapqandyǵy jaiynda naqty málimet joq.
Al Freedom Finance Global zertteýine súiensek, Pinduoduo.com tanymal internet alańyna jatady. Derekterge sáikes, saýalnamaǵa qatysqan qazaqstandyqtardyń 12,4 paiyzy bul platformany jii paidalanatynyn jetkizgen. Sonymen qatar olar marketpleisten aiyna 2-3 ret ( 29,3%) tapsyrys beretinderin jasyrmaǵan. Budan bólek Pinduoduo.com «eń tiimdi baǵany tabý múmkindigi» kategoriiasynda platformalar arasynda kósh bastap tur.
Foto: kasharynews.ru
Sheteldik e-kommertsiianyń ishki naryqqa áseri qandai?
Almatydaǵy kásipkerler sheteldik onlain dúkenderdiń eshki naryqqa áserin COVID-19 pandemiiasy kezinde sezine bastaǵanyn aitady. Máselen, Kenjahan-1 bazarynda 10 jyldan beri kiim-keshek satatyn Ainash Qulmetovanyń aitýynsha, onlain dúken taýarlary Almatyǵa tipti tez jetkiziledi, shamamen, ortasha 6-10 kúnde keledi. Onyń aitýynsha, sol sebepten Almaty turǵyndary keiingi jyldary bazar jaǵalaýyn azaitqan.
«Onlain tapsyrys berý paida bolǵaly beri bazarda saýda azaiǵanyn bárimiz moiyndaýymyz kerek. Qazir kóbine tek egde adamdar zat satyp alady», – deidi 52 jastaǵy satýshy.
Al syrt kiimder satatyn Sáýle Abdirova adamdardyń onyń dúkenine tek sýretke túsirý úshin keletinin aitady.
«Adamdar kúrteshelerdiń baǵasyn bile salysymen uialy telefondaryn shyǵaryp, taýarlardy fotoǵa túsire bastaidy. Sosyn sol sýretterdi Pinduoduo saityna júkteidi. Ol jerden dál meniń dúkenimdegidei kiimder óte arzan baǵada shyqqanyn kórsetip, baǵasyn túsirýdi surap jatady», – deidi saýdager.
Saýdagerlerdiń aitýynsha, bul óte jii kezdesetin qubylys.
Qazaqstandyq biznes ókilderi sheteldik e-kommertsiianyń el naryǵyna kirgenin ekspansiia dep atap, olarǵa qatysty shara qoldanýǵa shaqyrady. 30 tamyzda QazTech tehnologiialyq kompaniialar aliansy uiymdastyrǵan jiynda sóilegen shaǵyn jáne orta kásip ókilderi úkimetten qazaqstandyq biznesti qorǵap, sheteldik marketpleistermen ádil básekelestikti qamatamasyz etetin zań qabyldaýdy surady.
Jiynǵa qatysqan Qazaqstandaǵy internet-dúkenderdiń biriniń direktory Qytai onlain dúkenderinen keletin keibir taýarlar shekaradan fiosanitariialyq tekserýden de ótpei jiberile beretinin aitty. Onyń sózinshe, bul taýar importtaýshylarǵa birdei múmkindik týdyrmaidy.
Almatylyq kásipker Kerimjan Úristembek «Kúltegin» podkastyna bergen suqbatynda Pinduoduo úrdisi osylai jalǵasa berer bolsa shaǵyn kásiporyndardy qurtady degen oiyn jetkizdi. Sózinshe osy ýaqyttan bastap baqylaý jasalmasa, halyqtyń ál-aýqatyna áser etedi.
Al Qaraqat Darqanqyzy kerisinshe Pinduoduo-nyń paidasy jaily sóz etti. Ol óz maqalasynda Pinduoduo taýarlary qytai mádenietiniń elementterin qamtitynyn aitady. Iaǵni qosymshany qoldaný arqyly Qazaqstan men Qytai arasy mádeni qundylyqtarmen almasatynyn jazǵan. Sonymen qatar taýarlar baǵasynyń azdyǵy Qazaqstadaǵy áleýmettik jáne ekonomikalyq teńsizdikti azaitýy múmkin ekendigi týraly da aita ótti.
«Arzan jáne sapaly ónimderdiń qoljetimdiligi tómen tabysty halyq toptaryna kómek kórsetýge múmkindik beredi», – deidi ol óz maqalasynda.
Finprom.kz resýrsynyń jazýynsha, Qazaqstan naryǵyndaǵy Wildberries jáne Ozon platformalary Qazaqstanda resmi ókildigi bar, al qytailyq Pinduoduo men Temu dúkenderi elde tirkelmegen. Resýrs onlain-dúkenniń Qazaqstanda tirkelmei isteýi el ekonomikasyna da, tutynýshylarǵa da keri áserin tigizedi dep jazady.
“Birinshiden, platforma elde tirkelmese, ol el biýdjetine tólem júrgizbeidi, iaǵni baj ne tabysynan túsetin salyqty tólemeidi… Odan bólek bul taýardy importtaǵanda salyq tóleitin eldegi shaǵyn jáne orta bizneske keri áser etedi”, – dep jazdy Finprom.kz.
Sondai-aq, marketpleis resmi elde tirkelmese, tutynýshylar qyzmet sapasyna qanaǵattanbaǵanda shaǵymdanyp, ne aqshasyn qaitaryp ala almai qalatyny taǵy bar.
Foto: kitau.ru
Ýaqytsha isi toqtaǵan Pinduoduo
Qoldanystaǵy jaqsy kórsetkishterge qaramastan, 19 qazanda Pinduoduo barlyq resmi onlain tasymaldaýshylardyń jumysyn toqtatty degen aqparat tarady. Al memlekettik Qazpost kompaniiasynyń málimetinshe, marketpleis tasymaldaýshylar jumysyn ýaqytsha jetildirýge bailanysty toqtatylǵan. Jumys qashan qalpyna kelerin sol kezde naqty aita almady.
Sol kúnnen qytailyq resýrsqa úirenip qalǵan qazaqstandyqtar onlain tapsyrys bere almai qalǵanyn talqylai bastady. Olar eger qosymshada taýar tańdaý batyrmasyn bassańyz «bul mekenjaiǵa jetkizý múmkin emes» degen jazý paida bolady, deidi.
Taldyqorǵandyq Merei Serikqyzy marketpleistiń isten shyqqany týraly estigende kóńili túsip qalǵanyn jasyrmady. Ol 2022 jyldan beri Pinduoduo.com saitynyń turaqty satyp alýshysy eken. Dúkennen óziniń kúndelikti turmysyna qajetti zattarǵa tapsyrys berip otyrǵan. Mereidiń aitýynsha, ózi ornalasqan Taldyqorǵan qalasyna tapsyrystary 10-12 kún aralyǵynda qolyna tiedi eken.
«Men kiim-keshekten bastap, usaq-túiek zattarǵa deiin osy saittan tapsyrys berip keldim. Maǵan unaityny qoljetimdi baǵalardy aitpaǵanda, saitta tańdaýdyń óte keńdigi. Sait endigári jumys istemeidi degende jabyrqap qaldym. Sebebi arzan baǵa men erekshe zattarǵa qatty úirenip qalǵanmyn», – deidi 26 jastaǵy Taldyqorǵan qalasynyń turǵyny.
Almaty qalasyndaǵy Sániia Bolatbek te Qytai saitynyń qoldanýshysy. Ol da osy ýaqytqa deiin 3 jyl kóleminde úzdiksiz kerek zatyn Pinduoduo-dan alyp júrgen.
«Qytai dúkenderi saýdasyn toqtatar bolsa, onyń balamalaryn tabý qiyn emes. Qazir Wildberries, Kaspi.kz siiaqty platformalardan da qalaǵanyńyzdy taba alasyz. Tek baǵasy men sapasy ózgeleý bolady. Al odan bólek satyp alǵan zatyńyz da qolyńyzǵa pindýodýodan qaraǵanda tez tiedi», – deidi ol.
Sániia keide arzandyǵyna qyzyǵyp alǵan qytai zattarynyń sapasy óte nashar bolatynyn da atap ótti.
Al 12 qarasha kúni QazPost qyzmeti Pinduoduo arqyly tapsyrys berý múmkindigi qaita iske qosylǵanyn málimdedi. Qazaqstandyqtar qytaidan tapsyrys beretin taýarynyń ár kilogramyna 3,7 dollardan tóleitin bolady.
Jaina Turarbek
