Qazaqstannan Qytaiǵa baratyn poiyz, avtobýs pen ushaqtardyń ýaqytsha toqtaǵany belgili. Osy rette QR IIDM Azamattyq aviatsiia komitetiniń tóraǵasy Talǵat Lastaev pen Kólik komitetiniń tóraǵasy Samat Ǵylymov jolaýshylarǵa bilet quny qalai qaitarylatynyn túsindirip berdi, dep habarlaidy QazAqparat.
QR IIDM Kólik komitetiniń tóraǵasy Samat Ǵylymovtyń aitýynsha, poiyz ben avtobýsqa alynǵan biletterdiń quny tolyǵymen iesine qaitarylady.
«Nur-Sultan-Úrimji men Almaty-Úrimji baǵytyndaǵy poiyzdar Aqtoǵai stansasynda bir poiyz bolyp birigip, ary qarai Úrimjige baǵyt alatyn. Ol jaqqa bilet alǵandardyń kóbi Dostyq stansasynan túsip qalady. Anyqtaǵanymyzdai, Dostyqtan ary qarai Úrimjige deiin 22 bilet alynǵan eken. Osy 22 adamnyń ishinde 8-i biletti qaitarǵan. Qalǵan 14 adamǵa operatorlar habarlasyp, poiyzdyń júrmeitinin, bilet qunyn alyp ketýi kerektigin aityp jatyr», - dedi Samat Ǵylymov.
Al Azamattyq aviatsiia komitetiniń tóraǵasy Talǵat Lastaevtyń aitýynsha, áýe biletteriniń de tolyq quny ielerine qaitarylady. 3 aqpannan bastap atalǵan reisterge bilet alǵandar ony satyp alǵan jerlerine qaitara alady. Biletter úshin aqsha aiyppulsyz rásimdelip, tolyq kólemde qaitarylady. Qalyp qoiǵan jolaýshylardy elge qaitarý úshin Beijiń jáne Úrimji qalalarynan qosymsha reister uiymdastyrylady.
Eske sala ketsek, buǵan deiin Samat Ǵylymov Qazaqstannan Qytaiǵa baratyn barlyq avtobýs pen poiyz ýaqytsha toqtatylǵanyn, Azamattyq aviatsiia komitetiniń tóraǵasy Talǵat Lastaev 3 aqpannan bastap Qytai Halyq Respýblikasymen turaqty áýe qatynasy ýaqytsha toqtaitynyn habarlaǵan edi.
