Koronavirýspen kúres sharalary aiasynda Qytai Qazaqstanǵa 5 tonna gýmanitarlyq kómek jiberdi, dep habarlaidy QazAqparat.
QR Densaýlyq saqtaý vitse-ministri Kamaljan Nadyrovtyń aitýynsha, gýmanitarlyq kómek túrinde jeke qorǵanys quraldary men naýqastardy emdeý úshin dárilik preparattar jetkizildi.
«Qytaida epidemiialyq jaǵdai nasharlaǵanda Qazaqstan atynan gýmanitarlyq kómek jiberilgen edi. Búgingi júk arasynda meditsinalyq qurylǵylar joq. Bir rettik qorǵanys kiimi, meditsinalyq maska, kózildirik syndy meditsina mamandaryna qajet qorǵanys quraldary jetkizildi. Onyń jalpy salmaǵy 5 tonnadan asady», - dedi vitse-ministr elorda áýejaiynda tilshilerge bergen suhbatynda.
Sonymen birge, Qytaidyń Qazaqstandaǵy elshisi Chjan Siao dástúrli dárilerdiń de jetkizilgenin aitty.
«Dárigerler bortynan bólek, ekinshi ushaqta gýmanitarlyq kómek jetkizildi. Onyń arasynda meditsinalyq betperde, teplovizor, kózildirik, qolǵap jáne dástúrli qytai dárileri bar. Jańa virýsqa qarsy vaktsina men belsendi dáriler bolmaǵandyqtan, dál osy dástúrlik dáriler koronavirýspen kúreste kómek kórsetken edi», - dedi Chjan Siao.
Elshiniń aitýynsha, qytailyq tarap taǵy da qosymsha gýmanitarlyq kómek jiberýge daiyn.
Aita keteiik, búgin Qytaidyń Shyńjan-Uiǵyr avtonomdy aýdanynan 10 dáriger Qazaqstan astanasyna keldi. Olar koronavirýs infektsiiasyn juqtyrǵandardy emdeý boiynsha tájiribe almasady. Elshiniń aitýynsha, Qytaidyń meditsinalyq brigadalary búginde Pákistan, Italiia, Iran elderinde jumys istep jatyr. Qazaqstan - QHR dárigerleri barǵan TMD elderi arasyndaǵy jalǵyz memleket.
