Qytai elinde turatyn qandasymyz belgili aqyn, aitys sahnasynyń tarlanbozy Jamalqan Qarabatyrqyzy 81 jasynda dúnieden ótti, dep habarlaidy QazAqparat.
Jamalqan Qarabatyrqyzy - 1940 jyly QHR Shynjań ólkesiniń Tarbaǵatai aimaǵyndaǵy Jaiyr taýynda týǵan. Ol - Shyńjańdaǵy qazaqtardyń aitys óneriniń kóshin bastaýshy. Burynǵy ótken aqyndarda kóp ushyraityn jumbaq aitys túrin qaita túletip, keiingi býynǵa ózindik úlgi kórsete bilgen aqyn.
Ol - ár jyldary qatysqan alaman aitystarda bas júldeni 18 márte jeńip alǵan aitys aqyndarynyń ustazy. Sonymen birge aqyn aýyz ádebieti jáne onyń aiyrym túrlerin zertteýge den qoiǵan. Jamalqan Qarabatyrqyzy «Aitys jáne meniń áriptesterim», «Berdihan qandai aqyn», «Aýyz ádebietindegi áielderdiń orny», «Kórkemdik pen sheshendik», «Joqtaýlar neni aitady», «Aitystyń minezi», «Besik jyrynyń belgisi», «Aýyl áýenderi», «Jyr nóseri» sekildi kóptegen syn-zertteý eńbekteriniń avtory.
Sondai-aq aýdandyq, oblystyq aqyndar aitysyn uiymdastyrý jumystarymen ainalysqan. Joǵary oqý oryndarynda ashylǵan aqyndar synyptaryna aitys ónerdiń ár qyrynan arnaýly sabaqtar bergen. Sońǵy jyldary aqynnyń eńbekteri qytai tiline aýdarylyp, kitap bolyp shyqty.
