QR Syrtqy ister ministri Qairat Ábdirahmanov konsýldyq máseleler boiynsha Beijińde ótken kezekti qazaqstandyq-qytailyq konsýltatsiiaǵa qatysty túsinikteme berdi, dep habarlaidy "Ult aqparat".
«Sheteldegi Qazaqstan azamattarynyń múddesimen bailanysty barlyq jumystar tek qana turaqty nazarda turǵan joq. Biz kún saiyn osy máselelermen jumys isteimiz. Eger, bizdiń QHR-men yntymaqtastyǵymyz jaiynda sóz bolsa, onda kelissózder júrgizýge esh kedergi joq. Kelissózderdiń, QHR-men arada qol jetkizilgen ýaǵdalastyqtardyń qorytyndysynda tutqyndalǵan 12 azamatymyzdyń 9-y bosatyldy. Qalǵan úsh azamatymyzǵa qatysty biz tyńǵylyqty jumystar júrgizýdemiz», - dedi Qairat Ábdirahmanov Úkimet otyrysynan keiin BAQ ókilderine.
Ministrdiń aitýynsha, QHR-men barlyq kelissózder seriktestik rýhynda júrgizilýde.
«Shetelde júrgen Qazaqstannyń barlyq azamatynyń quqyǵy biz úshin basymdyq. Sózsiz qorǵalatyn bolady», - dedi ol.
Esterińizge sala ketsek, ótken aptada Qazaqstan men Qytaidyń syrtqy saiasi vedomstvolary arasynda konsýldyq máseleler týraly konsýltatsiialar ótkizildi.
«Qazaqstandyq tarap Qytaidan Qazaqstanǵa qonys aýdarǵan jáne Qazaqstan Respýblikasynyń azamattyǵyn alǵan etnikalyq qazaqtardyń jaǵdaiyna qatysty máseleni qozǵady. Qytaida qos azamattyq úshin ustalǵan etnikalyq qazaqtardyń isterin obektivti jáne ádil qaraý men olardy bosatý týraly tabandy tilek aityldy. Qytaidyń Shyńjań-Uiǵyr avtonomiialyq ólkesindegi etnikalyq qazaqtardyń máselelerin sheshýdiń ortaq amalyn oilastyrýǵa ýaǵdalasty», - delingen QR SIM baspasóz qyzmeti taratqan aqparatta.
