Qytaida Eńbek kúnine orai beskúndik mamyr merekesiniń alǵashqy tórt kúninde ishki týristik saparlar sany 104 million boldy, dep habarlaidy QazAqparat.
QHR Mádeniet jáne týrizm ministrliginiń habarlaýynsha, osy ýaqyt aralyǵynda ishki týrizmnen túsetin kiris 43,23 mlrd iýanǵa (shamamen 6,13 mlrd AQSh dollary) jetti.
Shekteýler engizilýine bailanysty Qytaidyń tanymal kórikti jerlerine kelýshilerdiń jalpy sany ótken jylǵy kórsetkishterden az.
Aita ketsek, 2019 jyly mamyrdaǵy merekeniń tórt kúninde Qytai turǵyndarynyń jasaǵan ishki týristik saparlarynyń sany 195 mln bolatyn. Ótken jyldyń mamyr aiynyń demalys kúnderindegi týrizmnen túsken tabys 17,48 mlrd.
Qytaida mamyr merekesi kúnderi eń joǵary sanattaǵy 5A deńgeidegi 8,5 myń týristik nysan ashyldy, bul olardyń jalpy sanynyń 70%-yn quraidy.
«Mamyr merekesiniń alǵashqy kúninde keibir týristik nysandar lyq toldy, kelýshiler tipti, maska dakigen joq», - dedi QHR Densaýlyq saqtaý isteri jónindegi memlekettik komissiianyń resmi ókili Mi Fen.
Osyǵan bailanysty Qytai sheneýnigi halyq kóp jinalatyn jerlerde maska kiiý jáne gigiena erejelerin saqtaý qajettiligin taǵy da eske saldy .
Eske sala keteiik, keshe QHR-daǵy iri onlain-týristik qyzmet operatory Trip.com biylǵy jyldyń 1-5 mamyr aralyǵynda 80 millionǵa jýyq adam elge saiahat jasaýǵa jinalǵanyn habarlaǵan bolatyn. Qytaida eń tanymal, adamdar kóp barǵan baǵyttar – Beijiń men Shanhai.
