"Qytaida qamaýǵa alynyp, Qazaqstanǵa qaita almai otyrǵan" birneshe qazaqstandyqtyń úilerine oralǵany habarlandy. Bul týraly Azattyqqa "Atajurt erikti jastary" aqparattyq ortalyǵynyń ókili Qydyráli Orazuly habarlady.
Qydyráli Orazulynyń aitýynsha, Qytaida qamaýda otyrǵan segiz azamattyń jeteýi Qazaqstanǵa oralǵan. Olar - Kóksebek Orynbek, Muqash Erkesh jáne jáne Taldyqorǵan qalasynda turatyn erli-zaiypty. Orazuly elge oralǵan taǵy eki adamnyń aty Aman men Arman ekenin aitty. Qurmet Ersinbek atty azamattyń da Qazaqstanǵa jetkeni habarlandy.
Ózin "Kóksebek Orynbektiń týǵan apaiymyn" dep qana tanystyrǵan adamnyń aitýynsha, inisi Qytaida tórt ai saiasi úiretý ortalyǵynda bolǵan.
- Densaýlyǵy onsha emes. Ázirge basynan ótken oqiǵalar týraly eshteńe aitqan joq, - deidi ol.
Al Sarqyt Babash "kúieýiniń Tarbaǵatai aimaǵy Sháýeshek qalasyndaǵy saiasi úirený ortalyǵynda 20 kún otyrǵanyn, sáýirdiń 12-si kúni bosap, sol kúni Almatyǵa, úige jetkenin" aitty.
Qytaidaǵy etnikalyq qazaqtardyń jappai qysymǵa ushyraǵany týraly aqparat 2017 jyldyń sáýir aiynan bastap tarai bastaǵan. Shyńjańda ustalǵandar arasynda Qytaidan tarihi otanyna oralyp, Qazaqstan azamattyǵyna ie bolǵandar da bar.
Buǵan deiin Almatyda bir top qazaqstandyq týystaryn Qytaida zańsyz ustap otyrǵanyna narazylyq tanytyp, ákimdikten beibit sherýge ruqsat suraǵan.
