27 naýryzdaǵy jaǵdai boiynsha Qytaida COVID-19 koronavirýs infektsiiasyna qarsy vaktsinanyń 100 millionnan astam dozasy qoldanyldy. Bul týraly QHR Densaýlyq saqtaý isteri jáne gigiena jónindegi memlekettik komiteti málim etti, dep habarlaidy "Ult aqparat".
«2021 jylǵy 27 naýryzdaǵy jaǵdai boiynsha Qytaidyń túrli óńirlerinde koronavirýsqa qarsy vaktsinanyń 102,417 mln dozasy qoldanyldy» delingen vedomstvo habarlamasynda.
Osy aptada QHR biligi sheteldik azamattarǵa COVID-19-ǵa qarsy halyqty vaktsinalaý baǵdarlamalaryna qatysýǵa ruqsat ashylǵanyn jariialady. Atap aitqanda, Beijińde 18 jastan asqan sheteldik azamattarǵa koronavirýsqa qarsy vaktsinatsiia bastalǵanyn habarlady.
Vaktsinatsiia erikti túrde azamattyń óz esebinen qytai óndirisiniń eki komponentti preparatymen júrgiziledi. Bir inektsiia quny 93,5 iýan (aǵymdaǵy baǵam boiynsha shamamen 14,3 AQSh dollary) bolady.
Qytai biligi profilaktikalyq ekpe koronavirýsty juqtyrý qaýpin edáýir tómendetedi dep eskertedi. Alaida, eshqandai vaktsina COVID-19 virýsynan 100% qorǵaýǵa kepildik bermeidi. Vaktsinatsiia aiaqtalǵannan keiin qoǵamdyq oryndarda maska taǵý, jeke gigiena jáne áleýmettik qashyqtyq erejelerin saqtaý kerek.
Sońǵy resmi málimetterge sáikes, QHR-da koronavirýs juqtyrǵandardyń 94,67%-y emdelip shyqty. 2019 jyldyń jeltoqsan aiynan bastap aýrý juqtyrǵandar sany 90,1 myńnan asty, meditsinalyq mekemelerde koronavirýs infektsiiasyna shaldyqqan 167 adam jatyr. Ólim kórsetkishi 5,14% (4636 adam qaitys boldy).
