Qytai telearnasy Dimash Qudaibergenovti qorǵaý úshin arnaiy tórt kúzetshi bóldi, - dep habarlaidy "Ult aqparat". Mundai aqpardy ánshiniń prodiýseri ári dosy Alpamys Sharimov jetkizip otyr.
"Bul kúzetshilerdi bizge Hunan TV arnasy bóldi. Sebebi olar óz paiymdaýynsha, Dimash syrtqa shyqqan kezde jalǵyz júrmeýi kerektigin eskertip aitty. Desek te, biz basynda, árine, bulai bolady dep oilamadyq. Biraq uiymdastyrýshylardyń aitqany ras bolyp shyqty. Adamdar kóptep tanyǵandyqtan, bizge kúzetshilerdiń qajet ekenin sol kezde túsindik", - deidi Instagram jelisinde ánshini tanyp, sýretke túsip jatqan jankúierlerdiń sýretin jariialaǵan prodiýser.
© Alpamys Sharimov
Sondai-aq, ol muny Dimash Qudaibergenovtyń jankúierlerimen arnaiy kezdesýi emes ekenin aitty. "Jankúierlermen, ókinishke qarai, resmi túrde kezdesken joqpyz. Ol kezde kóshege úige syilyq alý úshin, óz josparlarymyzben shyqqan bolatynbyz. Bul arnaiy kezdesý emes, kóshedegi kisilerdiń kezdesip, tanyp jatqany", - dedi ol.
Aita keteiik, prodiýserdiń aitýynsha, qytailyqtar qazaq tili kýrstaryna jazylyp jatyr eken. "Aitpaqshy, búginnen bastap bir top qytailyq Dimashtyń fanattary qazaq tili kýrsyna jazylypty. Dimashtyń ana tilin túsiný úshin. Jýrnalister qulaǵyna altyn syrǵa: bul resmi aqparat!", - dep jazdy ol.
Eske salaiyq, qazaqstandyq ánshi Dimash Qudaibergenov Qytaidaǵy I Am a Singer mýzykalyq baiqaýyna qatysqannan keiin bul elde tanymal boldy. Kóptegen BAQ otandasymyz týraly jazyp jatqany jaily da aqparat taraǵan edi.
Dimash Qudaibergenov teleshoýdyń birinshi kezeńinde SOS d'un terrien en détresse ánin frantsýz tilinde oryndap, jeńimpaz atanǵan bolatyn. Ánshi qatysyp jatqan konkýrsta 14 kezeń bar. Konkýrs Qytaidyń Chansha qalasynda ótip jatyr. Kelesi kezeńniń qorytyndysy 28 qańtardashyǵady. Kelesi kezeńde ol Reseidiń áigili ánshisi Vitastyń eń kúrdeli sanalatyn "Opera 2" kompozitsiiasyn oryndaidy. Alaida bul týraly habarlaǵan ánshi ózin Vitaspen salystyrmaýdy suraǵan bolatyn. Árine, Vitas jaqsy ánshi, ony qurmetteimin, biraq men "Ekinshi Vitas" emespin! Mýzykadan xabary bar mamandar meni jaqsy túsinedi!..", - dep jazǵan edi ánshi Instagram jelisinde.
