Qytai Pekinniń Shyńjańdaǵy saiasatyn atap aitqanda, túrkitildi musylmandardy qýdalaýyn synaǵan batys kompaniialaryna shúilige bastady, dep habarlaidy Azattyq.
Qytaidyń tehnologiialyq kompaniialary men memlekettik aqparat quraldary qatań baqylanatyn áleýmettik jelilerdiń kómegimen álemge tanymal brendterge "tiisip jatyr". Qytaidyń tanymal tulǵalary Nike-tiń sport jabdyqtarynan bas tartyp, álemge kiim satýmen tanymal bolǵan H&M ónimderin satyp almaitynyn kezek-kezek málimdep jatyr. Qytai kiim shyǵaratyn britandyq Burberry kompaniiasynyń ónimderine de boikot jariialaǵan.
"Qytailyqtar keibir sheteldikterge "sý ishken qudyǵyna túkirýine" jol bermeidi" dedi syrtqy ister ministrliginiń resmi ókili Hýa Chýnin Pekinde ótken jiynda jýrnalisterge. Ol qytai naryǵynda aqsha taýyp júrgen batys kompaniialaryna memlekettiń saiasatyn synaýyna jol bermeimiz degendei emeýrin tanytqan.
BUU-nyń adam quqyǵy jónindegi belsendileri men sarapshylary Shyńjańdaǵy "qaita tárbieleý lagerlerinde" keminde bir million uiǵyr men ózge de túrkitildi musylman qamalǵanyn málimdegen. Quqyq qorǵaýshylar Qytai biligin áielderdi kúshpen sterilizatsiialady jáne adam eńbegin qanady dep aiyptaidy.
Jeltoqsan aiynda Bi-bi-si saity Qytaidyń júzdegen myń az ult ókilin Shyńjańdaǵy maqta alqaptarynda jumys isteýge májbúrlegeni týraly iri zertteý jariialaǵan.
Shyńjań – maqta óndirý boiynsha álemde jetekshi oryn alatyn aimaqtardyń biri. Ol kóptegen batys kompaniialaryn shikizatpen qamtamasyz etedi.
Osyǵan deiin birqatar batys kompaniialary (arasynda Nike pen H&M de bar) adam quqyǵynyń buzylýyna bailanysty Shyńjańnan maqta satyp alýdan bas tartqan.
