Qytai halyqty azat etý armiiasy Qyrǵyzstan qarýly kúshterine óteýsiz áskeri-tehnikalyq kómek berdi. Bul týraly Azattyqtyń Qyrǵyz qyzmeti habarlady.
Qyrǵyzstan qorǵanys ministrliginiń aqparattyq jumys basqarmasynyń habarlaýynsha, áskeri-tehnikalyq múlikti tabystaý rásimi 26 mamyrda qorǵanys kúshteriniń ulttyq gvardiiasynda ótken. Sharaǵa Qyrǵyzstan qorǵanys ministri, general-maior Taalaibek Omýraliev pen Qytaidyń Qyrǵyzstandaǵy tótenshe jáne ókiletti elshisi Dý Deven qatysqan. Olar áskeri ónimdermen tanysyp, tehnikalyq sipattaryn talqylaǵan.
Shara aiaqtalǵannan keiin Qyrǵyzstan qorǵanys ministri Qytai armiiasyna kómegi úshin alǵys aityp, aldaǵy ýaqytta yntymaqtastyqtyń arta beretinine senim bildirgen.
Vedomstvo málimetinshe, áskeri-tehnikalyq kómek Qyrǵyzstan men Qytai qarýly kúshteri arasynda osyǵan deiin jasalǵan kelisim aiasynda berilgen.
Kezinde sarapshylar "Qytai uzaq jyldardan beri terrorizm, separatizm jáne dini ekstremizmmen kúresti Shanhai yntymaqtastyq uiymynda áskeri yqpalyn arttyrý úshin paidalandy, qarý satqanda nemese ony óteýsiz bergende resmi Pekin Shyńjańdaǵy jaǵdaidy negizge alady" dep atap ótken.
Qytaidy halyqaralyq qaýymdastyq Shyńjańda uiǵyr, qazaq jáne ózge de túrkitildi musylmandarǵa genotsid jasap otyr dep aiyptaidy. Muny joqqa shyǵarǵan Pekin ondaǵy "saiasi qaita tárbieleý lagerlerin" túrli kásipke baýlityn ortalyqtar dep ataǵan.
