قىتاي حالىقتى ازات ەتۋ ارميياسى قىرعىزستان قارۋلى كٷشتەرٸنە ٶتەۋسٸز ەسكەري-تەحنيكالىق كٶمەك بەردٸ. بۇل تۋرالى ازاتتىقتىڭ قىرعىز قىزمەتٸ حابارلادى.
قىرعىزستان قورعانىس مينيسترلٸگٸنٸڭ اقپاراتتىق جۇمىس باسقارماسىنىڭ حابارلاۋىنشا, ەسكەري-تەحنيكالىق مٷلٸكتٸ تابىستاۋ رەسٸمٸ 26 مامىردا قورعانىس كٷشتەرٸنٸڭ ۇلتتىق گۆارديياسىندا ٶتكەن. شاراعا قىرعىزستان قورعانىس مينيسترٸ, گەنەرال-مايور تاالايبەك ومۋراليەۆ پەن قىتايدىڭ قىرعىزستانداعى تٶتەنشە جەنە ٶكٸلەتتٸ ەلشٸسٸ دۋ دەۆەن قاتىسقان. ولار ەسكەري ٶنٸمدەرمەن تانىسىپ, تەحنيكالىق سيپاتتارىن تالقىلاعان.
شارا اياقتالعاننان كەيٸن قىرعىزستان قورعانىس مينيسترٸ قىتاي ارميياسىنا كٶمەگٸ ٷشٸن العىس ايتىپ, الداعى ۋاقىتتا ىنتىماقتاستىقتىڭ ارتا بەرەتٸنٸنە سەنٸم بٸلدٸرگەن.
ۆەدومستۆو مەلٸمەتٸنشە, ەسكەري-تەحنيكالىق كٶمەك قىرعىزستان مەن قىتاي قارۋلى كٷشتەرٸ اراسىندا وسىعان دەيٸن جاسالعان كەلٸسٸم اياسىندا بەرٸلگەن.
كەزٸندە ساراپشىلار "قىتاي ۇزاق جىلداردان بەرٸ تەرروريزم, سەپاراتيزم جەنە دٸني ەكسترەميزممەن كٷرەستٸ شانحاي ىنتىماقتاستىق ۇيىمىندا ەسكەري ىقپالىن ارتتىرۋ ٷشٸن پايدالاندى, قارۋ ساتقاندا نەمەسە ونى ٶتەۋسٸز بەرگەندە رەسمي پەكين شىڭجاڭداعى جاعدايدى نەگٸزگە الادى" دەپ اتاپ ٶتكەن.
قىتايدى حالىقارالىق قاۋىمداستىق شىڭجاڭدا ۇيعىر, قازاق جەنە ٶزگە دە تٷركٸتٸلدٸ مۇسىلماندارعا گەنوتسيد جاساپ وتىر دەپ ايىپتايدى. مۇنى جوققا شىعارعان پەكين ونداعى "ساياسي قايتا تەربيەلەۋ لاگەرلەرٸن" تٷرلٸ كەسٸپكە باۋليتىن ورتالىقتار دەپ اتاعان.
