28 qańtar kúni Almatyda Qytaidyń Qumyl aimaǵy Barkól aýdanynan kelgen etnikalyq qazaqtar Qytaida jazyqsyz qýǵyn kórip otyr degen týystaryna arasha surap baspasóz máslihatyn ótkizdi, dep habarlaidy Azattyq.
"Atajurt eriktileri" qoǵamdyq uiymynyń keńsesinde ótken jiynda qatysýshylardyń biri jinalǵandar atynan AQSh prezidenti Donald Tramp pen Resei prezidenti Vladimir Pýtinnen arasha surap, aǵylshyn jáne orys tilderinde úndeý oqydy.
Jiynǵa 30-ǵa tarta adam keldi. Olardyń keibiri balasy saiasi úirený lagerinde, keibiri týystarynyń úiqamaqta otyrǵanyn, birazy týystarynyń sottalyp ketkenin aitsa, taǵy biriniń týystary Qazaqstanǵa qaita almai otyrǵanyn aitady.
Qytaidyń Shyńjań óńirinde etnikalyq azshylyqqa, onyń ishinde etnikalyq qazaqtarǵa qysym jasaý týraly derekter 2017 jyldyń sáýirinen bastap túsip jatyr.
Byltyr Qazaqstan syrtqy ister ministrligi Qytaida qamaýda otyrǵan qazaqtardyń týystarynan 915 ótinish túskeni, 2018 jyldyń basynan beri Qytai taraby eki myńnan astam qazaqtyń Qytai aýmaǵynan ketýine ruqsat bergenin habarlaǵan. Resmi málimet boiynsha, sonymen birge Qytaida qos azamattyǵy úshin kúdikti sanalyp, ustalǵan 29 qazaqstandyqtyń 15-i bostandyqqa shyqqan.
