Qytaidyń soltústiktegi Sian qalasynan Germaniianyń Mangeim qalasyna jańa júk poiyzy baǵyty iske qosyldy. Uzyndyǵy 11,3 myń shaqyrymdy quraityn jol Qazaqstan arqyly ótedi, onyń ishinde Kaspii men Qara teńizderdi kesip ótedi, dep habarlaidy QazAqparat agenttigi.
42 konteiner tielgen alǵashqy quram sáýir aiynyń ekinshi onkúndiginde Sian qalasynan shyqty. Jańa baǵyt – aralas, iaǵni temirjol jáne teńiz júk tasymaly. Ol Germaniianyń Mangeim qalasyna kelgenge deiin Qazaqstan, Ázerbaijan, Grýziia, Ortalyq jáne Shyǵys Eýropa elderi arqyly ótedi.
Jańa baǵyt Sian men Eýropadaǵy logistikalyq habtar arasynda júretin 16-shy júk poiyzy.
Eske sala keteiik, «Qytai-Eýropa» baǵyty boiynsha alǵashqy júk poiyzy Sian qalasynan 2013 jyly jolǵa shyqqan bolatyn. 2022 jyldyń birinshi toqsanynyń qorytyndysy boiynsha Sian Eýropaǵa barlyǵy 790 júk poiyzyn jóneltken.
Biylǵy jyldyń aqpan aiynda Tsindao teńiz portynan (Shandýn provintsiiasy, Shyǵys Qytai) Qazaqstan arqyly Germaniiaǵa júk poiyzdarynyń jańa baǵyty iske qosylǵan bolatyn. Ol kezde de sońǵy pýnkt retinde Mangeim qalasy belgilengen edi.
Qytailyq logistikalyq kompaniialardyń málimeti boiynsha, 2021 jyly Shandýn provintsiiasynda «Qytai-Eýropa» baǵytyndaǵy 1,8 myńnan astam júk poiyzy óńdelgen.
Germaniianyń Federaldyq statistikalyq basqarmasynyń statistikasy kórsetkendei, Germaniia men Qytai arasyndaǵy saýda ainalymynyń kólemi 2021 jyly aldyńǵy jylmen salystyrǵanda 15,1 paiyzǵa artyp, 278,5 milliard dollardy quraǵan.
