Shansi provintsiiasynyń biznesmenderimen kezdesý barysynda pavlodarlyq tarap Shansimen salystyrǵanda alty esege arzan elektr energiiasy men «Pavlodar» arnaiy ekonomikalyq aýmaǵynda túrli jeńildikter usyndy, dep habarlaidy pavlodarnews.kz.
Eske sala keteiik, Pavlodar oblysynyń delegatsiiasy oblys ákimi Bolat Baqaýovtyń bastamasymen Qytai Halyq Respýblikasynda issaparmen júr. Shansi provintsiiasynda "business-to-business" formatyndaǵy kezdesýge jergilikti kásiporyn men qarjy organdarynyń shamamen 30 ókili qatysty. Provintsiianyń reforma jáne damý komiteti basshysynyń orynbasary Chen Tszeeniń aitýynsha, Shansi kómir óndirý, elektr energiiasyn óńdeý, kokstaý, taý-ken jabdyqtary men kómir-himiia óndirisinde keshendi jáne biriktiriligen damý úshin kóp kúsh salýda. Ol mashina shyǵarý, qazirgi zamanǵy kómir-himiia, jańa materialdar ónerkásibi men arnaiy azyq-túlik óndirisi qarqyndy damýda ekenin atap ótti. Aldyńǵy qatarly jabdyqty júzege asyrý nátijesinde túsken kiris - 141,8 milliard iýan. Shansi kásiporyndarynyń kirisine keletin bolsaq, kásiporynnyń negizgi qyzmeti shamamen 1,8 trillion iýandy, al kiristen túsken salyqtar 177 milliard iýandy quraidy. - Bizdiń oblys sizder siiaqty kómir óndirýmen jáne himiia ónimderin shyǵarýmen ainalysady. Meniń oiymsha, bizdiń provintsiia men sizdiń oblys arasynda yntymaqtastyq úshin áleýet bar, - dedi Chen Tszee.
Óz kezeginde Pavlodar oblysynyń ákimi Pavlodar men Shansi munai-himiia, kómir-himiia jáne logistika salalarynda jumys istei alatynyn atap ótti. - Eki óńir de óz memleketterinde kómir óndirýden kóshbasshy bolyp esepteledi, - dedi Bolat Baqaýov. - Degenmen statistika kórsetkendei, sońǵy bes jylda tutyný kólemi 10 paiyzǵa túsip qalǵan. Sondyqtan búgingi tańda kómirdi tereńnen óńdeý máselesi tur. Sizder bul salada belgili bir tájiribege qol jetkizdińizder. Shansi provintsiiasy kómirdi gazǵa jáne ári qarai suiyq otynǵa óńdeý tehnologiialaryn sátti qoldanatyny belgili. Biz úshin sizderdiń kompaniialaryńyzdyń tájiribesi óte mańyzdy.
Budan keiin «Kazakh Invest» kompaniiasynyń óńirlik direktory Oljas Ryskeldi investitsiialyq tartymdylyq pen Pavlodar oblysynyń eksporttyq áleýeti týraly aityp berdi. Kezdesý barysynda óńirdiń múmkindikteri týraly beinefilm kórsetildi.
