Atyraý oblysyndaǵy mal nodýliarlyq dermatit indetine shaldyqty. Osynyń kesirinen kórshi Qytai eline et eksporty toqtap tur. Aýyl sharýashylyǵy ministrliginde ótken brifingte Mal sharýashylyǵy departamenti direktorynyń mindetin atqarýshy Azamat Saǵynbaev osylai aitty, dep habarlaidy Baq.kz tilshisi.
«Biyl elimiz syrtqa 10 myń tonna et eksporttaýdy josparlaǵan. Bul jospardyń 34 paiyzy oryndaldy, iaǵni 3 439 tonna et eksporttaldy. Jospardyń oryndalmaýy elimizdiń basty naryǵy – Reseide rýbldiń kóterilip, bizdiń ettiń Reseiden qymbatyraq bolyp, baǵa jaǵynan básekege shydai almaýyna bailanysty. Ekinshi másele, Atyraý oblysyndaǵy mal nodýliarlyq dermatit indetine shaldyqty. Bul jait ta eksportty damytýǵa kedergi keltirdi. Osynyń saldarynan etti Qytaiǵa da eksporttaý múmkin bolmai otyr. Atyraý óńirinde joǵaryda atalǵan indet tirkelgendikten, qazirgi tańda Qytai eksport úshin Qazaqstandy tolyq jaýyp tastady. Búgingi kúni Veterinarlyq baqylaý komiteti aimaqty ashý boiynsha jumys jasap jatyr. Bul másele sheshilgennen keiin, Qytaiǵa et eksporty jandanýy tiis», - deidi Azamat Saǵynbaev.
Atap ótsek, 2010 jyly Kedendik odaq aiasynda Reseige et eksporty 60 myń tonnaǵa jetedi delingen edi. Biraq, bul jospar oryndalmai jatyr.
Saǵynbaevtyń aitýynsha, sol kezde iri qara mal basy 6 mln dep eseptelgen. Degenmen, mal sanaǵynan keiin 800 myń -1 millionǵa deiin mal basy jetpei qalǵan. Osy jáne basqa da jaittar 60 myń tonna et eksporty indiktoryna yqpal etken.
«Bul kórsetkishke jetý úshin qazir keshendi sharalar atqarylyp jatyr. Memlekettik baǵdarlama boiynsha 2021 jylǵa qarai et eksportyn 70 myń tonnaǵa jetkizý josparlanyp otyr», - deidi Saǵynbaev.
Alaida, biyl shet memleketterge 10 myń tonna ǵana et eksporttaý kózdelgen jáne búgingi kúnge deiin bul jospardyń tek 34 paiyzy oryndalǵan.
