Qytaidyń koronavirýsty aldyn alý jáne naýqastardy emdeýde tájiribesi mol joǵary bilikti dárigerleri qazaqstandyq mamandarǵa kómek kórsetpek. Bul týraly coronavirus2020.kz saity habarlady.
Quramyna koronavirýs infektsiiasynyń aldyn alý jáne koronavirýsqa shaldyqqan naýqastardy emdeýde tájiribesi mol joǵary bilikti dárigerler kiretin Qytai delegatsiiasynyń missiiasy - qazaqstandyq meditsina qyzmetkerlerine COVID-19 qarsy kúreste konsýltatsiialyq ádistemelik kómek kórsetý, onyń ishinde COVID-19 aldyn alý jáne baqylaýdyń Qytai tájiribesimen, jaqyn bailanystardy anyqtaý jáne oqshaýlaý tetikterimen tanysý, qoldanystaǵy klinikalyq emdeý hattamalaryna usynystar berý jáne t.b.
Bul bastamany Qazaqstan tarapy osy jyldyń 24 naýryzynda Memleket basshysy Q-J. Toqaevtyń Qytai Halyq Respýblikasynyń (QHR) Tóraǵasy Si Tszinpinmen COVID-19 jańa koronavirýs infektsiiasyna qarsy kúreste QHR-nyń Qazaqstanǵa jan-jaqty qoldaý kórsetýi týraly telefon arqyly sóilesý barysynda qol jetkizilgen ýaǵdalastyqty júzege asyrý maqsatynda usyndy.
Diplomatiialyq arnalar arqyly qytailyq sarapshylardy Qazaqstanǵa jiberýdi uiymdastyrý máselelerin sheshýge qatysty ekijaqty kelissózder júrgizilýde.
Búgin 7 sáýirde QR densaýlyq saqtaý vitse-ministri L.M.Aqtaevanyń tóraǵalyǵymen QHR densaýlyq saqtaý komiteti ókilderi men qytailyq dárigerlermen onlain kezdesý ótti.
Kezdesýge Qazaqstan tarapynan QR densaýlyq saqtaý vitse-ministri K.Nadyrov, QR Densaýlyq saqtaý ministrliginiń jaýapty hatshysy B.Jaqselekova, Nur-Sultan, Almaty, Qaraǵandy qalalaryndaǵy meditsinalyq JOO rektorlary, Nur-Sultan, Almaty qalalary men Qaraǵandy oblysynyń densaýlyq saqtaý basqarmasynyń basshylary, sondai-aq QR Syrtqy ister ministrliginiń ókilderi qatysty.
Qytai tarapynan Chjan Ganchan myrza – Qytaidyń Shyńjań-Uiǵyr avtonomiialyq ólkesi (ShUAÓ) Densaýlyq saqtaý komitetiniń inspektory, He Shaohýa myrza – Qytai densaýlyq saqtaý komiteti Halyqaralyq yntymaqtastyq departamenti direktorynyń orynbasary, qytailyq dárigerler, Qytaidyń Syrtqy ister ministrligi men QR-daǵy QHR Elshiliginiń ókilderi qatysty.
Osy onlain kezdesý barysynda taraptar 13 mamannan turatyn qytailyq delegatsiianyń Qazaqstanǵa saparynyń baǵdarlamasyn, yntymaqtastyqtyń basym baǵyttaryn, COVID-19 taqyryby boiynsha qazaqstandyq dárigerlerge arnalǵan trening taqyryptaryn, logistika máselelerin jáne t.b. keńinen talqylady. Delegatsiia quramynda pýlmonologiia, infektsiia, shuǵyl terapiia, epidemiologiia, qoǵamdyq densaýlyq saqtaý jáne t.b. sala mamandary bar.
QHR dárigerleri sáýirdiń basynda Nur-Sultanǵa arnaiy uiymdastyrylǵan ushaqpen ushyp keledi. Sonymen qatar delegatsiiamen birge Qytaidan gýmanitarlyq kómektiń ekinshi bóligi de jetkiziledi dep kútilýde.
