Búgin Qytaida koronavirýs pandemiiasy saldarynan qaitys bolǵandar men adamdardyń ómirin saqtap qalý úshin óz ómirin qurban etken dárigerlerdi eske alyp, jalpyulttyq aza tutý kúni dep jariialandy.
Senbi kúni jergilikti ýaqytpen 10:00-de Qytai turǵyndary jańa koronavirýs qurbandaryn 3 minýt únsizdikpen eske aldy. Aza tutý belgisi retinde avtokólikterdiń, poiyzdar men kemelerdiń sirenasy qosyldy.
El boiynsha týlar tómen túsirildi, onyń ishinde sheteldik elshilik mańy, bas konsýldyq jáne halyqaralyq uiym ókildikterindegi týlar da bar.
Qoǵamdyq oiyn-saýyq sharalarynyń bári toqtatyldy. QHR vedomstvolary, ulttyq BAQ men qytailyq izdeý saittary koronavirýstyń jańa túrinen qaitys bolǵandarǵa aza tutyp, aq-qara tústi bezendirýge kóshti.
Ótken táýlikte qurlyqtyq Qytaida koronavirýstan 4 adam qaza boldy, virýs juqtyrǵandar sany 19 adamǵa kóbeidi, 18 adam dertinen aiyqty, dep habarlady QHR Densaýlyq saqtaý isteri boiynsha memlekettik komitet.
«2020 jyldyń 3 sáýirinde qurlyqtyq Qytaida koronavirýstyń belgisi joq 64 jańa oqiǵa tirkeldi, onyń 26-sy syrttan ákelingen. Qazirgi ýaqytta 1030 aýrý belgisi joq tasýshy meditsina qyzmetkerleriniń baqylaýynda», - delingen senbi kúni jariialanǵan mekeme biýlleteninde.
Resmi málimet boiynsha, qurlyqtyq Qytaida infektsiia juqtyrǵandardyń jalpy sany 81,6 myń adamnan asty, olardyń 76,7 myńy emdelip shyǵyp, 3326-y ómirden ótti.
Buǵan deiin, 4 sáýir Qytaida jańa koronavirýs infektsiiasynan qaza tapqandardy jalpyulttyq aza tutý kúni ekeni habarlanǵan bolatyn.
