Búgin QR Tuńǵysh Prezidenti - Elbasynyń kitaphanasynda QHR Tóraǵasy Si Tszinpinniń qazaq tilindegi «El basqarý jóninde» atty kitabynyń tanystyrylymy ótti, dep habarlaidy QazAqparat.
«QHR Tóraǵasy Si Tszinpinniń qazaq tilinde jaryq kórgen «El basqarý jóninde» kitabynyń tusaýkeseri eki eldiń arasyndaǵy diplomatiialyq qarym-qatynastardyń ornaýynyń 25 jyldyǵy tusynda ótip otyrýynyń tereń simvoldyq máni bar dep oilaimyn. Osy jyldarda ekijaqty qarym-qatynastar ózara udaiy senimdi ár konstrýktivti jaǵdaida damyp keledi. Qytai Qazaqstannyń strategiialyq odaqtasy ári basty saýda-ekonomikalyq seriktesteriniń biri bolyp tabylady. Qazirgi tańda Qazaqstan men Qytaidyń qarym-qatynastary jańa deńgeige kóterilip otyr. Ǵasyrlar boiy Shyǵys pen Batysty jalǵastyryp kelgen Uly Jibek jolynyń búginde ekinshi tynysy ashyldy dep aitýǵa bolady. QHR-dyń bastamashylyq tanytyp jáne júzege asyryp jatqan «Bir beldeý, bir jol» baǵdarlamasy Uly Jibek joly boiyndaǵy kóptegen elderdiń yntymaqtastyǵy úshin zor múmkindikter ashady», - dedi kitaptyń tanystyrylymynda sóz sóilegen QR Prezidenti Keńsesi basshysynyń orynbasary Baqytjan Temirbolat.
Al Qytaidyń Qazaqstandaǵy Tótenshe jáne Ókiletti Elshisi Chjan Hanhoi atalǵan kitapta qytai halqynyń uly armanyn qalai júzege asyrýy týraly baiandalǵanyn aitty.
«Qytai men Qazaqstannyń birlese otyryp, bul kitapty jaryqqa shyǵarýy eki eldiń yntymaqtastyǵy úshin barynsha mańyzdy shara. Eki eldiń bir-birinen tájiribe almasýyna septigin tigizip, memleketterdiń birlesken strategiialaryna tyń serpilis beredi. Buǵan qosa eki eldiń qarym-qatynastarynyń deńgeii joǵary ekendigin ańǵartady. QR Prezidenti Nursultan Nazarbaevtyń arnaiy shaqyrýymen QHR Tóraǵasy Si Tszinpin myrza Qazaqstanǵa úshinshi resmi saparymen keledi jáne ShYU-ǵa múshe memleketter basshylarynyń otyrysyna, EKSPO-2017 mamandandyrylǵan halyqaralyq kórmesiniń resmi ashylý saltanatyna qatysady», - dedi Chjan Hanhoi.
QR Tuńǵysh Prezidenti - Elbasy qory janyndaǵyÁlemdik ekonomika jáne saiasat institýtynyń direktory Erjan Saltybaev Si Tszinpinniń «El basqarý jóninde» kitaby 2014 jyldan beri 100-den astam memlekette 6 mln danamen basylyp shyqqanyn atap ótti.
«Bul kitaptyń qazaq tilinde aýdarylýy Memleket basshysynyń úzdik zamanýi ádebietterdi qazaq tiline aýdarý boiynsha qoiǵan tapsyrmalaryna jaýap berip, memlekettik tildegi ádebiet qoryn tolyqtyrady. Sonymen qatar oqyrman aýditoriiasy aitarlyqtai ulǵaiady», - dedi ol.
Aita keteiik, kitapqa Si Tszinpinniń 2012 jyldyń 15 qarashasynan 2014 jyldyń 13 maýsymyna deiin kópshilik aldynda sóilegen 79 sózi, suhbaty, baiandamasy, oqyǵan dáristeri men quttyqtaý hattary engen.
